월인석보 9권
뎌 藥師瑠璃光如來 恭敬 供養ᄒᆞᅀᆞᄫᅩᄆᆞᆯ 엇뎨 ᄒᆞ며
續命幡燈復云何造。
續命幡과 燈과ᄅᆞᆯ 엇^뎨 ᄆᆡᇰᄀᆞᆯ리ᅌᅵᆺ고
救脫菩薩言。
救脫菩薩이 니ᄅᆞ샤ᄃᆡ
大德。若有病人欲脫病苦。
大德아 아뫼나 病ᄒᆞᆫ 사ᄅᆞ미 病을 여희오져 ᄒᆞ거든
當爲其人七日七夜受持八分齋戒。
그 사ᄅᆞᆷ 爲ᄒᆞ야 밤낫 닐웨ᄅᆞᆯ 八分齋戒 디녀
應以飲食及餘資具隨力所辯供養苾芻僧。
飮食이며 녀나ᄆᆞᆫ 거슬 제 쟈ᇰ마ᇰ혼 야ᅌᆞ로 쥬ᅌᅳᆯ 供養ᄒᆞ고
晝夜六時禮拜供養彼世尊藥師琉璃光如來。
밤낫 여슷 ᄢᅳᆯ 뎌 藥師瑠璃^光如來ᄅᆞᆯ 저ᅀᆞᄫᅡ 供養ᄒᆞᅀᆞᄫᅡ
讀誦此經四十九遍。燃四十九燈。
이 經을 마ᅀᆞᆫ아홉 디위 讀誦ᄒᆞ고 마ᅀᆞᆫ아홉 燈의 블 혀고
造彼如來形像七軀。
뎌 如來ㅅ 像 닐구블 ᄆᆡᇰᄀᆞᅀᆞᆸ고
一一像前各置七燈。一一燈量大如車輪。
像마다 알ᄑᆡ 닐굽 燈을 노호ᄃᆡ 燈마다 술위ᄠᅵ만 크긔 ᄒᆞ야
乃至四十九日光明不絕。
마ᅀᆞᆫ아ᄒᆞ래ᄅᆞᆯ 光明이 긋디 아니킈 ᄒᆞ고
造五色綵幡長四十九[打-丁+桀]手。
五色^ 綵幡을 ᄆᆡᇰᄀᆞ로ᄃᆡ 기릐 마ᅀᆞᆫ아홉 搩手ㅣ오
없음
搩手ᄂᆞᆫ 소ᄂᆞᆯ 펼씨니 사ᄅᆞᄆᆞᆫ 周尺으로 ᄒᆞᆫ 자히오 부텨ᄂᆞᆫ 두 자히시니라
應放雜類衆生至四十九
雜 숨ᄐᆞᆫ 쥬ᇰᄉᆡᇰ 마ᅀᆞᆫ아호ᄇᆞᆯ 노ᄒᆞ면
可得過度危厄之難不爲諸橫惡鬼所持。
어려ᄫᅳᆫ 厄ᄋᆞᆯ 버서나며 모딘 귓거슬 아니 자피리라
復次阿難。若剎帝利灌頂王等。災難起時。
ᄯᅩ 阿難아 ᄒᆞ다가 刹帝利 灌頂王ᄃᆞᆯ히 災難 니ᇙ 時節^에
難ᄋᆞᆫ 厄이라
所謂人衆疾疫難。他國侵逼難。
한 사ᄅᆞ미 쟈ᇰ셕ᄒᆞᄂᆞᆫ 難이어나 다ᄅᆞᆫ 나라히 보차ᄂᆞᆫ 難이어나
自界叛逆難。星宿變怪難。
ᄌᆞ걋 나라해셔 거슬ᄧᅳᆫ 야ᇰ ᄒᆞᄂᆞᆫ 難이어나 星宿ㅅ 變怪難이어나
星宿는 벼리라
變怪ᄂᆞᆫ 常例ᄅᆞᆸ디 아니ᄒᆞᆫ 妖怪라
日月薄蝕難。非時風雨難。
日食 月食 難이어나 時節 그른 ᄇᆞᄅᆞᆷ 비 難이어나
過時不雨難。
ᄀᆞᄆᆞᆳ ^ 難이어나 ᄒᆞ거든
彼剎帝利灌頂王等。爾時應於一切有情起慈悲心。赦諸繫閉。
뎌 王ᄃᆞᆯ히 一切 有情에 慈悲心ᄋᆞᆯ 내야 가도앳던 사ᄅᆞᆷ 노코
依前所說供養之法供養彼世尊藥師琉璃光如來。
알ᄑᆡ 니르던 야ᇰ다히 뎌 藥師瑠璃光如來ᄅᆞᆯ 供養ᄒᆞᅀᆞᄫᆞ면
由此善根及彼如來本願力故。令其國界卽得安穩。
이 됴ᄒᆞᆫ 根源과 뎌 如來ㅅ 本願力 젼ᄎᆞ로 그 나라히 즉자히 便安^ᄒᆞ야
風雨順時穀稼成熟。
ᄇᆞᄅᆞᆷ 비 時節에 마자 녀르미 ᄃᆞ외야
一切有情無病歡樂。
一切 有情이 無病歡樂ᄒᆞ며
歡樂ᄋᆞᆫ 깃거 즐길씨라
於其國中無有暴惡藥叉等神惱有情者。
그 나라해 모딘 夜叉 等 神靈이 有情 보차리 업스며
一切惡相皆卽隱沒。
一切 머즌 相이 다 업고
而剎帝利灌頂王等壽命色力無病自在皆得增益。
刹帝利 灌頂王ᄃᆞᆯ토 長壽ᄒᆞ고 病 업^서 다 自在ᄒᆞ리라
阿難。若帝后妃主儲君王子大臣輔相
阿難아 ᄒᆞ다가 皇帝며 皇后ㅣ며 妃子ㅣ며 太子ㅣ며 王子ㅣ며 大臣이며 宰相이며
中宮婇女百官梨庶爲病所苦及餘厄難。
大闕ㅅ 각시며 百官이며 百姓이 病을 ᄒᆞ거나 어려ᄫᅳᆫ 厄이어든
亦應造立五色神幡燃燈續明
ᄯᅩ 五色 神幡 ᄆᆡᇰᄀᆞᆯ며 燈 ^ 혀아 닛위여 ᄇᆞᆰ게 ᄒᆞ며
放諸生命散雜色華燒衆名香。
숨ᄐᆞᆫ 쥬ᇰᄉᆡᇰ 노코 雜色 고ᄌᆞᆯ 비ᄒᆞ며 여러 가짓 일훔난 香ᄋᆞᆯ 퓌우면
病得除愈衆難解脫。
病도 덜며 厄도 다 버스리라
爾時阿難問救脫菩薩言。
그ᄢᅴ 阿難이 救脫菩薩ᄭᅴ 묻ᄌᆞᄫᅩᄃᆡ
云何已盡之命而可增益。
엇뎨 ᄒᆞ마 다ᄋᆞᆫ 목수미 더으리ᅌᅵᆺ고
救脫菩薩言。大德。汝豈不聞如來說有九橫死邪。
救脫菩薩이 니ᄅᆞ샤ᄃᆡ 大德아 如來 ^ 니르시논 아홉 橫死ᄅᆞᆯ 매 몯 듣ᄌᆞᄫᅡ시ᇙ다
是故勸造續命幡燈修諸福德。
이럴ᄊᆡ 續命幡燈 ᄆᆡᇰᄀᆞ라 福德 닷고ᄆᆞᆯ 勸ᄒᆞ노니
以修福故盡其壽命不經苦患。
福ᄋᆞᆯ 닷ᄀᆞ면 목숨 ᄆᆞᆺᄃᆞ록 受苦ᄅᆞᆯ 아니 디내리라
阿難問言。九橫云何。
阿難이 묻ᄌᆞᄫᅩᄃᆡ 아홉 橫死ᄂᆞᆫ 므스기ᅌᅵᆺ고
救脫菩薩言。有諸有情得病雖輕。
救脫菩薩이 니ᄅᆞ샤ᄃᆡ 有情^ᄃᆞᆯ히 가ᄇᆡ야ᄫᆞᆫ 病을 어더도
然無醫藥及看病者。
醫와 [醫ᄂᆞᆫ 病 고티ᄂᆞᆫ 사ᄅᆞ미라] 藥과 病 간슈ᄒᆞ리 업거나
設復遇醫授以非藥。實不應死而便橫死。
醫ᄅᆞᆯ 맛나고도 왼 藥ᄋᆞᆯ 머겨 아니 주그ᇙ 저긔 곧 橫死ᄒᆞ며
又信世間邪魔外道妖孽之師
ᄯᅩ 世間앳 邪魔外道앳 妖蘖엣 스스ᅌᅳᆯ 信ᄒᆞ야
妖蘖은 妖怪라
妄說禍福便生恐動。
간대옛 禍福ᄋᆞᆯ 닐어든 곧 두리^ᄫᅳᆫ ᄠᅳ들 내야
心不自正卜問覓禍。
ᄆᆞᅀᆞ미 正티 몯ᄒᆞ야 됴쿠주믈 묻그리 ᄒᆞ야
殺種種衆生解奏神明
種種 쥬ᇰᄉᆡᇰ 주겨 神靈ᄭᅴ 플며
呼諸魍魎請乞福祐。
돗가비 請ᄒᆞ야 福ᄋᆞᆯ 비러
欲冀延年終不能得。
목숨 길오져 ᄒᆞ다가 乃終내 得디 몯ᄒᆞᄂᆞ니
愚癡迷惑信邪倒見。
어리여 迷惑ᄒᆞ야 邪曲ᄋᆞᆯ 信ᄒᆞ야 갓고로 볼ᄊᆡ
遂令橫死入於地獄無有出期。
橫死ᄒᆞ야 地獄애 드^러 나ᇙ 그지 업스니
是名初橫。
이ᄅᆞᆯ 첫 橫死ㅣ라 ᄒᆞᄂᆞ니라
二者橫被王法之所誅戮。
둘흔 王法을 니버 橫死ᄒᆞᆯ씨오
三者畋獵嬉戲耽婬嗜酒放逸無度
세흔 山行ᄋᆞᆯ ᄒᆞ거나 노ᄅᆞᄉᆞᆯ ᄒᆞ거나 婬亂ᄋᆞᆯ 맛들어나 수으를 즐기거나 듧ᄭᅥᄫᅥ 조심 아니ᄒᆞ다가
橫爲非人奪其精氣。
귓거시 精氣ᄅᆞᆯ 아ᅀᅡ 橫死ᄒᆞᆯ씨오
四者橫爲火焚。
네흔 브레 ᄉᆞᆯ여 橫死^ᄒᆞᆯ씨오
五者橫爲水溺。
다ᄉᆞᄉᆞᆫ 므레 ᄲᅡ디여 橫死ᄒᆞᆯ씨오
六者橫爲種種惡獸所噉。
여스ᄉᆞᆫ 모딘 쥬ᇰᄉᆡᇰ 믈여 橫死ᄒᆞᆯ씨오
七者橫墮山崖。
닐구븐 묏 언헤 ᄠᅥ디여 橫死ᄒᆞᆯ씨오
八者橫爲毒藥厭禱咒咀起屍鬼等之所中害。
여들븐 厭禱와 [厭은 ᄀᆞ오누ᄅᆞᆯ씨오 禱ᄂᆞᆫ 빌씨라] 毒藥과 起屍鬼ᄃᆞᆯ히 害ᄒᆞ야 橫死ᄒᆞᆯ씨오
九者飢渴所困不得飲食而便橫死。
아호븐 주으리며 목 ᄆᆞᆯ라 橫死ᄒᆞᆯ씨니
是爲如來略說橫死有此九種。
이 如^來 어둘 니르시논 아홉 가짓 橫死ㅣ니
其餘復有無量諸橫難可具說。
ᄯᅩ 그지업슨 여러 橫死ㅣ 몯내 니르리라
復次阿難。彼琰魔王主領世間名藉之記。
ᄯᅩ 阿難아 뎌 琰魔王이 世間앳 일훔 브튼 글와ᄅᆞᆯ ᄀᆞᅀᆞᆷ아랫ᄂᆞ니
若諸有情不孝五逆
ᄒᆞ다가 有情ᄃᆞᆯ히 不孝ᄅᆞᆯ ᄒᆞ거나 五逆을 ᄒᆞ거나
破辱三寶壞君臣法
三寶ᄅᆞᆯ 허러 辱ᄒᆞ거나 ^ 君臣ㅅ 法을 헐어나
君臣ㅅ 法은 님금 臣下ㅅ 法이라
毀於信戒。琰魔法王隨罪輕重考而罰之。
信戒ᄅᆞᆯ 헐어나 ᄒᆞ면 琰魔法王이 罪ᄋᆡ 야ᅌᆞ로 詳考ᄒᆞ야 罪 주ᄂᆞ니
詳考ᄂᆞᆫ 子細히 마초ᄧᅥ 알씨라
是故我今勸諸有情燃燈造幡
이럴ᄊᆡ 내 이제 有情ᄃᆞᆯᄒᆞᆯ 勸ᄒᆞ야 燈 혀며 幡 ᄆᆡᇰᄀᆞᆯ며
放生修福。令度苦厄
산 것 노하 福ᄋᆞᆯ 닷가 苦厄ᄋᆞᆯ 버^서나
不遭衆難。
여러 難ᄋᆞᆯ 맛나디 아니케 ᄒᆞ노라
爾時衆中有十二藥叉大將俱在會坐。
그ᄢᅴ 衆 中에 열두 夜叉大將이 모ᄃᆞᆫ 座애 잇더니
大將ᄋᆞᆫ 큰 將軍이라
所謂宮毘羅大將。伐折羅大將。迷企羅大將。安底羅大將。頞爾羅大將。珊底羅大將。
宮毗羅大將과 伐折羅大將과 迷企羅大將과 安底羅大將과 頞你羅大將과 珊^底羅大將과
因達羅大將。波夷羅大將。摩虎羅大將。真達羅大將。招杜羅大將。毘羯羅大將。
因達羅大將과 波夷羅大將과 摩虎羅大將과 眞達羅大將과 招杜羅大將과 毗羯羅大將과
此十二藥叉大將一一各有七千藥叉以爲眷屬。
이 열두 夜叉大將이 各各 七千 夜叉ᄅᆞᆯ 眷屬 사^맷더니
同時舉聲白佛言。
ᄒᆞᆫᄢᅴ 소리 내야 ᄉᆞᆯᄫᅩᄃᆡ
世尊。我等今者蒙佛威力
世尊하 우리 이제 부텻 威力을 닙ᄉᆞᄫᅡ
得聞世尊藥師琉璃光如來名號。
藥師瑠璃光如來ㅅ 일후믈 듣ᄌᆞᄫᅩ니
不復更有惡趣之怖。
ᄂᆞ외야 惡趣 저푸미 업스니
我等相率皆同一心乃至盡形歸佛法僧。
우리ᄃᆞᆯ히 다 ᄒᆞᆫ ᄆᆞᅀᆞᄆᆞ로 죽ᄃᆞ록 三寶애 歸依ᄒᆞᅀᆞᄫᅡ
誓當荷負一切有情
盟誓ᄅᆞᆯ 호ᄃᆡ 一切 有情^을 어버 ᄃᆞᆫ녀
爲作義利饒益安樂。
利益ᄒᆞ며 安樂ᄒᆞᆫ 이ᄅᆞᆯ 지ᅀᅮ리니
隨於何等村城國邑空閑林中。
아ᄆᆞ란 ᄆᆞᅀᆞᆯ히어나 자시어나 ᄀᆞ올히어나 나라히어나 뷘 수프리어나
若有流布此經或復受持藥師琉璃光如來名號
이 經을 너비 펴며 藥師瑠璃光如來ㅅ 일후믈 디니ᅀᆞᄫᅡ
恭敬供養者。
恭敬 供養ᄒᆞᅀᆞᄫᆞ리옷 잇거든
我等眷屬衛護是人。
우리ᄃᆞᆯ히 이 사ᄅᆞᄆᆞᆯ ^ 衛護ᄒᆞ야
衛護ᄂᆞᆫ 들어 더브러셔 護持ᄒᆞᆯ씨라
皆使解脫一切苦難。
다 一切 苦難ᄋᆞᆯ 버서나고
諸有願求悉令滿足。
願ᄒᆞ논 이ᄅᆞᆯ 다 일의 호리ᅌᅵ다
或有疾厄求度脫者。亦應讀誦此經。
아뫼나 病이며 厄이 이셔 버서나고져 ᄒᆞᇙ 사ᄅᆞᄆᆞᆫ 이 經을 讀誦ᄒᆞ며
以五色縷結我名字。
五色 실로 우리 일후믈 ᄆᆡ자
得如願已然後解結。
제 願을 일운 後에 글어ᅀᅡ ᄒᆞ리ᅌᅵ다
爾時世尊讚諸藥叉大將言。
그ᄢᅴ 世尊이 夜叉大^將ᄃᆞᆯᄒᆞᆯ 讚歎ᄒᆞ야 니ᄅᆞ샤ᄃᆡ
善哉善哉。汝等念報世尊藥師琉璃光如來恩德者。
됴타 됴타 너희ᄃᆞᆯ히 藥師瑠璃光如來ㅅ 恩德 갑ᄉᆞᄫᅩᆯ 이ᄅᆞᆯ 念ᄒᆞ거든
常應如是利益安樂一切有情。
샤ᇰ녜 이러트시 一切 有情을 利益ᄒᆞ며 安樂긔 ᄒᆞ라