월인석보 12권
名一闡提，
일후믈 一闡提라 ᄒᆞᄂᆞ니라
內有是因故
안해 이 因이 이실ᄊᆡ
從佛為緣。
부텨 조ᄍᆞᄫᅡ 緣 사마
觀四諦理聞聲悟道。
四諦理ᄅᆞᆯ 보아 소리 듣고 道ᄅᆞᆯ 아니
名聲聞乘。
일후미 聲聞乘이니
欲速機小。故譬羊車。
ᄲᆞᄅᆞ고져 ᄒᆞ야 機 져글ᄊᆡ 羊車에 가ᄌᆞᆯ비시니라
若有眾生，從佛 世尊聞法信受，
ᄒᆞ다가 衆生이 佛 世尊ᄋᆞᆯ 조차 法 듣고 信受ᄒᆞ야
慇懃精進，
브즈러니 精進ᄒᆞ야
求自然慧，
自然^慧ᄅᆞᆯ 求ᄒᆞ야
樂獨善寂，
獨ᄋᆞᆯ 즐겨 이대 寂ᄒᆞ야
深知諸法因緣，是名辟支佛乘，
諸法 因緣을 기피 아ᄂᆞ닌 이 일후미 辟支佛乘이니
如彼諸子為求鹿車出於火宅；
뎌 아ᄃᆞᆯᄃᆞᆯᄒᆡ 鹿車 求ᄒᆞ야 火宅애 나미 ᄀᆞᆮᄒᆞ니라
辟支此云獨覺。
辟支ᄂᆞᆫ 獨覺이라 혼 마리니
亦通緣覺。
ᄯᅩ 緣覺이라 호미 通ᄒᆞ니
出無佛世。
부텨 업스신 뉘예 나
觀物變易自覺無生。
物의 變ᄒᆞ야 고텨 ᄃᆞ외ᄂᆞᆫ 주ᄅᆞᆯ 보고 제 無生ᄋᆞᆯ 알ᄊᆡ
故號獨覺。
號ᄅᆞᆯ 獨覺이라 ᄒᆞ고
觀十二緣覺真諦理。
十^二緣을 보아 眞諦理ᄅᆞᆯ 알ᄊᆡ
故號緣覺。
號ᄅᆞᆯ 緣覺이라 ᄒᆞᄂᆞ니라
求自然慧樂獨善寂。即獨覺也。
自然慧ᄅᆞᆯ 求ᄒᆞ야 獨善寂을 즐규ᄆᆞᆫ 獨覺이오
深知諸法因緣。即緣覺也。
諸法 因緣을 기피 아로ᄆᆞᆫ 緣覺이라
此乘斷三界見思。與聲聞同。
이 乘이 三界 見思 그추믄 聲聞과 ᄀᆞᆮ호ᄃᆡ
更侵斷習氣
習氣ᄅᆞᆯ 다시 侵勞ᄒᆞ야 그처
根性猛利。故居聲聞上。
根性이 ᄆᆡᆸ고 ᄂᆞᆯ카ᄫᆞᆯᄊᆡ 聲聞 우히 ᄃᆞ외니
其機稍大。故譬鹿車。
그 機 져기 클ᄊᆡ 鹿車에 가ᄌᆞᆯ비시니라
若有眾生，從佛 世尊聞法信受，
ᄒᆞ다가 衆生이 佛 世尊ᄋᆞᆯ 조차 法 듣고 信受ᄒᆞ야
勤修精進，
브^즈러니 精進ᄒᆞ야
求一切智、佛智、自然智、無師智，如來知見、力、無所畏，
一切智와 佛智와 自然智와 無師智와 如來ㅅ 知見과 力과 無所畏ᄅᆞᆯ 求ᄒᆞ야
愍念、安樂無量眾生，
無量 衆生ᄋᆞᆯ 어엿비 너겨 安樂게 ᄒᆞ며
利益天人，
天人ᄋᆞᆯ 利益게 ᄒᆞ야
度脫一切，是名大乘，菩薩
一切ᄅᆞᆯ 度脫ᄒᆞᄂᆞ닌 이 ^ 일후미 大乘菩薩이니
求此乘故，名為摩訶薩，
이 乘을 求ᄒᆞᆯᄊᆡ 일후미 摩訶薩이니
如彼諸子為求牛車、出於火宅。
뎌 아ᄃᆞᆯᄃᆞᆯᄒᆡ 牛車 求ᄒᆞ야 火宅애 나미 ᄀᆞᆮᄒᆞ니라
此兼三乘集眾智之大根也。
이ᄂᆞᆫ 三乘을 兼ᄒᆞ야 한 智ᄅᆞᆯ 모돈 大根이라
一切智即菩薩智也。
一切智ᄂᆞᆫ 菩薩智오
佛智即一切種智也。
佛智ᄂᆞᆫ 一切 種智오
自然即離諸證取者。
自然智ᄂᆞᆫ 證ᄒᆞ야 가죠ᄆᆞᆯ 여흰 사ᄅᆞ미오
無師即不由他悟者。
無師智ᄂᆞᆫ ᄂᆞᄆᆞᆯ 브터 아디 아니ᄒᆞᄂᆞᆫ 사ᄅᆞ미니
能求眾智及如來知見廣大德用。
能히 한 智^와 如來ㅅ 知見 넙고 큰 德用을 求ᄒᆞ야
而愍安利度。所以為大菩薩。
어엿비 너겨 便安케 ᄒᆞ며 利益ᄒᆞ며 度脫호미 大菩薩이샨 고디니
其機為最。故譬牛車。
그 機 ᄆᆞᆺ 爲頭ᄒᆞᆯᄊᆡ 牛車에 가ᄌᆞᆯ비시니라
「舍利弗！
舍利弗아
如彼長者，見諸子等安隱得出火宅，到無畏處，
뎌 長者ㅣ 아ᄃᆞᆯᄃᆞᆯ히 便安히 火宅애 나 저품 업슨 ᄯᅡ해 다ᄃᆞ랫거ᄂᆞᆯ 보고
自惟財富無量，
제 너교ᄃᆡ 쳔랴ᅌᅵ 그지업소라 ᄒᆞ야
等以大車而賜諸子。
ᄒᆞᆫ가지로 큰 술위로 아ᄃᆞᆯᄃᆞᆯ^ᄒᆞᆯ 주니
如來亦復如是，為一切眾生之父，
如來 ᄯᅩ 이 ᄀᆞᆮᄒᆞ야 一切 衆生ᄋᆡ 아비 ᄃᆞ외야 이셔
若見無量億千眾生，以佛教門出三界苦，怖畏險道，得涅槃樂。
無量億千 衆生이 부텻 敎門ᄋᆞ로 三界苦 저픈 險ᄒᆞᆫ 길헤 나 涅槃樂 得ᄒᆞ얫거든 보면
「如來爾時便作是念：
如來 그ᄢᅴ 곧 너교ᄃᆡ
『我有無量無邊智慧、力、無畏等諸佛法藏，
내 無量無邊 智慧와 力과 無^畏 等 諸佛 法藏ᄋᆞᆯ 뒷노니
是諸眾生皆是我子，
이 衆生ᄃᆞᆯ히 다 내 아ᄃᆞ리니
等與大乘，
ᄒᆞᆫ가지로 大乘을 주어
不令有人獨得滅度，
아모 사ᄅᆞ미나 ᄒᆞ오ᅀᅡ 滅度ᄅᆞᆯ 得디 아니케 ᄒᆞ야
皆以如來滅度而滅度之。』
다 如來ㅅ 滅度로 滅度호리라 ᄒᆞ야
得涅槃樂。即權乘小果。
涅槃樂 得호ᄆᆞᆫ 權乘 小果ㅣ오
如來滅度而滅度之。即大乘極果。
如來ㅅ 滅度로 滅度ᄒᆞ샤ᄆᆞᆫ 大乘 極果^ㅣ라
是諸眾生脫三界者，悉與諸佛禪定、解脫等娛樂之具，
이 衆生ᄃᆞᆯ히 三界 버슨 사ᄅᆞᄆᆞᆯ 다 諸佛ㅅ 禪定解脫 等 즐기ᇙ 거슬 주ᄂᆞ니
皆是一相、一種，
다 이 ᄒᆞᆫ 相이며 ᄒᆞᆫ가지라
聖所稱歎，
聖人 일ᄏᆞ라 讚歎ᄒᆞ시논 거시라
能生淨妙第一之樂。
能히 조코 微妙ᄒᆞᆫ 第一엣 樂ᄋᆞᆯ 내ᄂᆞ니라
謂彼脫三界者。雖得小乘禪定解脫。
뎌 三界 버슨 사ᄅᆞ미 비록 小乘엣 禪定解脫ᄋᆞᆯ 得^ᄒᆞ야도
然猶厭有著空。非一相也。
有ᄅᆞᆯ 슬히 너겨 空애 著ᄒᆞ니 ᄒᆞᆫ 相이 아니오
裂為二乘。非一種也。
갈아 두 乘이 ᄃᆞ외니 ᄒᆞᆫ가지 아니오
執著未除。非淨也。
執著ᄋᆞᆯ 더디 몯ᄒᆞ니 조호미 아니오
空有未融。非妙也。
空有ㅣ 어우디 몯ᄒᆞ니 妙ㅣ 아니라
故與之諸佛禪定解脫娛樂之具。
그럴ᄊᆡ 諸佛ㅅ 禪定解脫 즐기ᇙ 거슬 주시니
如彼大車眾美具備。
뎌 큰 술위 한 됴ᄒᆞᆫ 거시 ᄀᆞᆺᄃᆞᆺ ᄒᆞ니라
「舍利弗！
舍利弗아
如彼長者，初以三車誘引諸子，然後
뎌 長者ㅣ 처ᅀᅥ믜 세 술위로 아ᄃᆞᆯᄃᆞᆯᄒᆞᆯ 달애야 ᅘᅧ낸 後에
但與大車，
다ᄆᆡᆫ 큰 술위ᄅᆞᆯ 주어
寶物莊嚴，
보ᄇᆡ옛 거스로 莊嚴^ᄒᆞ야
安隱第一；
便安호미 第一이니
然彼長者無虛妄之咎。
그러나 뎌 長者ㅣ 虛妄ᄒᆞᆫ 허므리 업스니
如來亦復如是，無有虛妄，
如來 ᄯᅩ 이 ᄀᆞᆮᄒᆞ야 虛妄이 업스니
初說三乘引導眾生，然後但以大乘而度脫之。
처ᅀᅥ믜 三乘을 닐어 衆生ᄋᆞᆯ 引導ᄒᆞᆫ 後에 다ᄆᆡᆫ 大乘ᄋᆞ로 度脫ᄒᆞᄂᆞ니
何以故？
엇뎨어뇨 ᄒᆞ란ᄃᆡ
如來有無量智慧、力、無所畏諸法之藏，
如來 그지업슨 智^慧와 力과 無所畏와 諸法藏ᄋᆞᆯ 두어
能與一切眾生大乘之法，
能히 一切 衆生ᄋᆡ게 大乘法ᄋᆞᆯ 주건마ᄅᆞᆫ
但不盡能受。
오직 다 能히 受티 몯ᄒᆞᄂᆞ니라
不盡能受者。機不齊故。
다 能히 受티 몯호ᄆᆞᆫ 機 ᄀᆞᄌᆞᆨ디 몯혼 젼ᄎᆡ라
「舍利弗！以是因緣，
舍利弗아 이 因緣ᄋᆞ로 알라
當知諸佛方便力故，於一佛乘分別說三。」
諸佛이 方便力으로 ᄒᆞᆫ 佛乘에 ^ ᄀᆞᆯᄒᆞ야 세흘 니ᄅᆞ시ᄂᆞ니라
없음
잇ᄀᆞ자ᇰ 譬喩品 ᄆᆞᆺ고 아래ᄂᆞᆫ 信解品이니
信解者。因聞喻說。以信得入悟解法要也。
信解ᄂᆞᆫ 喩說 듣ᄌᆞᄫᅩᄆᆞᆯ 因ᄒᆞ야 信ᄋᆞ로 드러 法要ᄅᆞᆯ 알씨라
前法說一周。
알ᄑᆡ 法說이 ᄒᆞᆫ 번 周ᄒᆞ야시ᄂᆞᆯ
身子於喻品之初領悟。
舍利弗이 譬喩品 처ᅀᅥ믜 아라듣ᄌᆞᄫᅡᄂᆞᆯ
佛於喻品述成與記。
부톄 譬喩品에 述成ᄒᆞ샤 記ᄅᆞᆯ 주시고
述成은 니ᅀᅥ ᄆᆞᄌᆞ 일울씨라
喻說一周。
喩說이 ᄒᆞᆫ 번 周ᄒᆞ야시ᄂᆞᆯ
四大弟子於此品領悟。
네 큰 弟子ㅣ 이 品에 ^ 아라듣ᄌᆞᄫᅡᄂᆞᆯ
佛於藥草品述成。授記品與記。
부톄 藥草品에 ᄆᆞᄌᆞ 일우샤 授記品에 記ᄅᆞᆯ 주시니
然大迦葉為上首弟子。而領悟後於身子者。
그러나 大迦葉은 上 首弟子ㅣ로ᄃᆡ 아라듣ᄌᆞᄫᅩ미 舍利弗ㅅ 後에 호ᄆᆞᆫ
此經融會二智。身子當機故先領悟也。
이 經이 두 智ᄅᆞᆯ 어울워 모도니 舍利弗이 當ᄒᆞᆫ 機ㄹᄊᆡ 몬져 아니라
諸大弟子皆內祕外現。
굴근 弟子ᄃᆞᆯ히 다 안해 菩薩行ᄋᆞᆯ ᄀᆞ초고 밧긔 聲聞ㅅ 모ᄆᆞᆯ 現ᄒᆞ니
根非中下悟無先後。
根이 中 下ㅣ 아니며 아로미 先後ㅣ 업건마ᄅᆞᆫ
為助揚法化故。次第敷陳也。
法化ᄅᆞᆯ 돕ᄉᆞᄫᅡ 펴믈 爲ᄒᆞᆯᄊᆡ 次第로 버리니라
月印千江之曲第十二
釋譜詳節第十二
揔五十一張