월인석보 15권
無諸聚落等者。滅眾生之染緣。
聚落 업숨ᄃᆞᆯᄒᆞᆫ 衆生ᄋᆡ 더러ᄫᅳᆫ 緣을 滅ᄒᆞ시고
移天人置他土。如淨名說菩薩斷取大千擲沙界外。
天人을 옮겨 다ᄅᆞᆫ ᄯᅡ해 두샤ᄆᆞᆫ 淨名에 니ᄅᆞᄃᆞᆺ ᄒᆞ야 菩薩이 大千을 자바 沙界 밧긔 더듀ᄃᆡ
其中眾生不覺不知。
그 中 衆生이 아디 몯ᄒᆞᄂᆞ다 ᄒᆞ니라
是時，諸佛各將一大菩薩以爲侍者，至娑婆世界，
이ᄢᅴ 諸佛^이 各各 ᄒᆞᆫ 大菩薩ᄋᆞᆯ ᄃᆞ리샤 뫼ᅀᆞᄫᆞ닐 사ᄆᆞ샤 裟婆世界예 니르르샤
各到寶樹下。一一寶樹高五百由旬，枝、葉、華、果次第莊嚴，
各各 寶樹마다 노ᄑᆡ 五百 由旬이오 가지와 닙과 곳과 果實왜 次第로 莊嚴ᄒᆞ고
諸寶樹下皆有師子之座，高五由旬，亦以大寶而校飾之。
寶樹 아래마다 다 師^子座ㅣ 이쇼ᄃᆡ 노ᄑᆡ 다ᄉᆞᆺ 由旬이오 ᄯᅩ 큰 보ᄇᆡ로 ᄭᅮ몟더니
爾時諸佛，各於此座結加趺坐。
그ᄢᅴ 諸佛이 各各 이 座애 結跏趺坐ᄒᆞ샤 이 야ᇰᄌᆞ로 展轉ᄒᆞ야
없음
展轉은 올ᄆᆞ며 올ᄆᆞᆯ씨라
如是展轉遍滿三千大千世界，而於釋迦牟尼佛一方所分之身猶故未盡。
三千大千世界예 ᄀᆞᄃᆞᆨᄒᆞ샤ᄃᆡ 釋迦牟尼佛ㅅ 一方애 分ᄒᆞ^샨 모미 ᄉᆞᆫᄌᆡ 몯 다앳더시니라
釋迦分身譬如一燈然百千燈。真應無盡而器界有窮。
釋迦ㅅ 分身ᄋᆞᆯ 가ᄌᆞᆯ비건댄 ᄒᆞᆫ 燈이 百千 燈 ᅘᅧᄃᆞᆺ ᄒᆞ야 眞實ㅅ 應은 다옴 업스샤ᄃᆡ 器界ᄂᆞᆫ 器具 世界니 依報ㅣ라
時釋迦牟尼佛，欲容受所分身諸佛故，八方各更變二百萬億那由他國，皆令淸淨，
그ᄢᅴ 釋迦牟尼佛이 分身諸佛을 바도려 ᄒᆞ샤 八方애 各各 다시 二百萬億 那^由他 國을 變ᄒᆞ샤 다 淸淨케 ᄒᆞ시니
無有地獄、餓鬼、畜生及阿修羅，
地獄 餓鬼 畜生과 阿修羅ㅣ 업고
又移諸天、人置於他土。所化之國，亦以琉璃爲地，寶樹莊嚴，
ᄯᅩ 天人ᄃᆞᆯᄒᆞᆯ 옮겨 다ᄅᆞᆫ ᄯᅡ해 두시니 化ᄒᆞ샨 나라히 ᄯᅩ 琉璃로 ᄯᅡ ᄆᆡᇰᄀᆞᆯ오 寶樹로 莊嚴ᄒᆞ니
樹高五百由旬，枝、葉、華、果次第嚴飾，
나못 노ᄑᆡ 五百 由旬이오 가지와 닙^과 곳과 果實왜 次第로 싁싀기 ᄭᅮ미고
樹下皆有寶師子座，高五由旬，種種諸寶以爲莊校。
나모 아래 다 보ᄇᆡ옛 師子座ㅣ 이쇼ᄃᆡ 노ᄑᆡ 五百 由旬이오 種種 보ᄇᆡ로 ᄭᅮ미고
亦無大海、江河，及目真鄰陀山、摩訶目真鄰陀山、鐵圍山、大鐵圍山、須彌山等諸山王，通爲一佛國土。
ᄯᅩ 大海 江河와 目眞隣陀山과 鐵圍山과 大鐵圍^山과 須彌山 等 諸山王이 업서 通히 ᄒᆞᆫ 佛國土ㅣ ᄃᆞ외오
寶地平正，寶交露幔遍覆其上；懸諸幡蓋，燒大寶香，諸天寶華遍布其地。
보ᄇᆡ옛 ᄯᅡ히 平正ᄒᆞ고 보ᄇᆡ 섯바곤 댜ᇰ이 그 우희 차 두피고 諸天寶華ㅣ ᄯᅡ해 ᄀᆞᄃᆞ기 ᄭᆞᆯ이니라
目真隣陀此云石。
目眞隣陀ᄂᆞᆫ 돌히라 혼 마리라
釋迦牟尼佛爲諸佛當來坐故，復於八方各更變二百萬億那由他國，皆令淸淨，
釋迦^牟尼佛이 諸佛이 와 안ᄌᆞ샤ᄆᆞᆯ 爲ᄒᆞ샤 ᄯᅩ 八方애 各各 다시 二百萬億 那由他 國을 變ᄒᆞ샤 다 淸淨케 ᄒᆞ시니
無有地獄、餓鬼、畜生及阿修羅，
地獄 餓鬼 畜生과 阿脩羅ㅣ 업고
又移諸天、人置於他土。所化之國，亦以琉璃爲地，寶樹莊嚴，
ᄯᅩ 天人ᄃᆞᆯᄒᆞᆯ 옮겨 다ᄅᆞᆫ ᄯᅡ해 두시니 化ᄒᆞ샨 ^ 나라히 ᄯᅩ 琉璃로 ᄯᅡ ᄆᆡᇰᄀᆞᆯ오 寶樹로 莊嚴ᄒᆞ니
樹高五百由旬，枝、葉、華、果次第莊嚴，
나못 노ᄑᆡ 五百 由旬이오 가지와 닙과 곳과 果實왜 次第로 莊嚴ᄒᆞ고
樹下皆有寶師子座，高五由旬，亦以大寶而校飾之。
나모 아래 다 보ᄇᆡ옛 師子座ㅣ 이쇼ᄃᆡ 노ᄑᆡ 五 由旬이오 ᄯᅩ 큰 보ᄇᆡ로 ᄭᅮ미고
亦無大海、江河，及目真鄰陀山、摩訶目真鄰陀山、鐵圍山、大鐵圍山、須彌山等諸山王，通爲一佛國土。
ᄯᅩ 大海江河^와 目眞隣陀山과 摩訶目眞隣陀山과 鐵圍山과 大鐵圍山과 須彌山 等 諸山王이 업서 通히 ᄒᆞᆫ 佛國土ㅣ ᄃᆞ외오
寶地平正，寶交露幔、遍覆其上；
보ᄇᆡ옛 ᄯᅡ히 平正ᄒᆞ고 보ᄇᆡ 섯바곤 댜ᇰ이 그 우희 차 두피고
懸諸幡蓋，燒大寶香，諸天寶華遍布其地。
幡盖ᄃᆞᆯ ^ ᄃᆞᆯ오 큰 寶香 퓌오고 諸天寶華ㅣ ᄯᅡ해 ᄀᆞᄃᆞ기 ᄭᆞᆯ이니라
淨名丈室能廣容多座｡
淨名에 丈室이 [丈ᄋᆞᆫ 열 자히니 維摩居士ㅅ 石室이 넙조ᄇᆡ ᄒᆞᆫ 丈일ᄊᆡ 丈室이라 ᄒᆞ니라] 能히 한 座ᄅᆞᆯ 너비 받다 ᄒᆞ며
釋迦化土如自在天宮｡
釋迦化土ㅣ 自在天宮 ᄀᆞᆮᄒᆞ시고
涌出之衆有無量河沙｡ 各詣靈山未聞迫窄｡
소사난 衆이 無量河沙ㅣ 各各 靈山애 오ᄃᆡ ^ 좁닷 말 몯 드로ᄃᆡ
而此必三變淨土｡ 乃能容受分身者｡ 特因事顯法耳｡
이ᅌᅥ긔 모로매 淨土ᄅᆞᆯ 세 번 變ᄒᆞ야ᅀᅡ 分身ᄋᆞᆯ 바ᄃᆞ샤ᄆᆞᆫ 이ᄅᆞᆯ 因ᄒᆞ야 法을 나토실 ᄯᆞᄅᆞ미라
葢淨土妙境生佛本共｡ 法身化體物我無虧｡
淨土妙境은 生佛이 本來 ᄒᆞᆫ가지며 法身化體ᄂᆞᆫ 物와 나왜 이즌 ᄃᆡ 업건마ᄅᆞᆫ
唯衆生識心自染自局｡ 故聖人因分身之來｡ 特與開示｡
오직 衆生ᄋᆡ 識心이 제 더러ᄫᅵ며 제 조필ᄊᆡ 聖人이 分身 오샤ᄆᆞᆯ 因ᄒᆞ샤 特別히 여러 뵈시니
初於娑婆一變者｡ 滅衆生染緣也｡
처ᅀᅥ믜 娑婆애 ᄒᆞᆫ 번 變ᄒᆞ샤ᄆᆞᆫ 衆生ᄋᆡ 더러ᄫᅳᆫ 緣을 滅ᄒᆞ샤미오
次於八方再變者｡ 遣識心限礙也｡
버거 八方애 다시 變ᄒᆞ샤ᄆᆞᆫ 識心에 그지 마고ᄆᆞᆯ ᄇᆞ리샤미오
後於八方復變者｡ 廓法界眞境也｡
後에 八方애 ᄯᅩ ^ 變ᄒᆞ샤ᄆᆞᆫ 法界 眞境을 훤히 여르샤미라
三變之後分身畢集｡
세 번 變ᄒᆞ신 後에 分身이 다 모ᄃᆞ시고
多寶全現者｡ 示染緣旣滅礙心旣遣眞境旣廓｡
多寶ㅣ 오로 現ᄒᆞ샤ᄆᆞᆫ 더러ᄫᅳᆫ 緣을 ᄒᆞ마 滅코 마ᄀᆞᆫ ᄆᆞᅀᆞᄆᆞᆯ ᄒᆞ마 ᄇᆞ려 眞境을 ᄒᆞ마 훤히 열면
則法身化體當處現前｡ 一多圓融隨念自在｡ 妙法大旨明此而已｡
法身 化體 當ᄒᆞᆫ 고대 알ᄑᆡ 現ᄒᆞ야 ᄒᆞ나콰 함괘 두려ᄫᅵ 노가 念을 조차 自在호ᄆᆞᆯ 뵈시니 妙法大旨 이ᄅᆞᆯ ᄇᆞᆯ길 ᄯᆞᄅᆞ미라
故茲因事特與開示也｡
그럴ᄊᆡ 이ᅌᅦ 이ᄅᆞᆯ 因ᄒᆞ야 特別히 여러 뵈시니라
淨名直示不思議境｡ 故卽丈室而廣容｡
淨名은 不思議境을 바ᄅᆞ 뵐ᄊᆡ 丈室에 나ᅀᅡ가 너비 받고
法華意在引權入實｡ 故自穢土而三變｡
法華ᄂᆞᆫ ᄠᅳᆮ이 權을 ᅘᅧ 實에 드류^메 이실ᄊᆡ 더러ᄫᅳᆫ ᄯᅡᄒᆞᆯ 브터 세 번 變ᄒᆞ시니
宗趣有異故建立不同｡
宗趣ㅣ 다ᄅᆞᆯᄊᆡ 셰유미 ᄀᆞᆮ디 아니ᄒᆞ니
得旨歸根夫何異也｡
ᄠᅳ들 得ᄒᆞ야 불휘예 가면 므스기 다ᄅᆞ리오 宗ᄋᆞᆫ ᄆᆞᆯ리오 趣는 ᄠᅳᆮ 向ᄒᆞᆫ ᄯᅡ히라
爾時東方釋迦牟尼佛所分之身，百千萬億那由他恒河沙等國土中諸佛，各各說法，
그ᄢᅴ 東方 釋迦牟尼 分身ᄒᆞ샨 몸 百千萬億 那由他 恒河沙等 國土 中 諸佛이 各各 說法ᄒᆞ시ᄂᆞ니
來集於此；如是次第十方諸佛皆悉來集，坐於八方。
이ᅌᅦ 와 모^ᄃᆞ샤 이ᄀᆞ티 次第로 十方 諸佛이 다 와 모ᄃᆞ샤 八方애 안ᄌᆞ시니
爾時一一方，四百萬億那由他國土諸佛如來遍滿其中。
그ᄢᅴ 方마다 四百萬億 那由他 國土 諸佛如來 그 中에 ᄀᆞᄃᆞᆨᄒᆞ시니라
是時，諸佛各在寶樹下，坐師子座，皆遣侍者問訊釋迦牟尼佛，
이ᄢᅴ 諸佛이 各各 寶樹 下애 겨샤 師子座애 안ᄌᆞ샤 ^ 다 뫼ᅀᆞᄫᆞ니 브리샤 釋迦牟尼佛ᄭᅴ 問訊ᄒᆞ샤
問訊은 安否 묻ᄌᆞᄫᆞᆯ씨라
各齎寶華滿掬而告之言：
各各 寶華ᄅᆞᆯ 우훔 차게 가지샤 니ᄅᆞ샤ᄃᆡ
「善男子！汝往詣耆闍崛山釋迦牟尼佛所，如我辭曰：
善男子아 네 耆闍崛山 釋迦牟尼佛ᄭᅴ 가 내 말로 ᄉᆞᆯᄫᅩᄃᆡ
『少病、少惱，氣力安樂，及菩薩、聲聞衆悉安隱不？』
少病 少惱ᄒᆞ시며 氣力이 便^安코 즐거ᄫᅳ시며 菩薩 聲聞衆이 다 便安ᄒᆞᆫ가 몯ᄒᆞᆫ가 ᄒᆞ고
以此寶華散佛供養，而作是言：
이 寶華로 부텻긔 비허 供養ᄒᆞᅀᆞᆸ고 ᄉᆞᆯᄫᅩᄃᆡ
『彼某甲佛，與欲開此寶塔。』」
뎌 某甲佛이 [某甲은 아모 甲이라] ᄒᆞᆫ가지로 이 寶塔을 열오져 ᄒᆞ시ᄂᆞᅌᅵ다 ᄒᆞ라
諸佛遣使，亦復如是。
諸佛이 使者 보내샤ᄃᆡ ᄯᅩ 이ᄀᆞ티 ᄒᆞ시^니라
分身之來不躬覲佛者。體同故也。
分身 오샤매 모미 부텨 뵈ᅀᆞᆸ디 아니ᄒᆞ샤ᄆᆞᆫ 體 同ᄒᆞ실ᄊᆡ니라
皆遣侍者致問開塔者。願同故也。
다 뫼ᅀᆞᄫᆞ니 보내샤 묻ᄌᆞᆸ고 塔 여르샤ᄆᆞᆫ 願이 同ᄒᆞ실ᄊᆡ니라
爾時釋迦牟尼佛，見所分身佛悉已來集，各各坐於師子之座，
그ᄢᅴ 釋迦牟尼佛이 分身佛이 다 와 모ᄃᆞ샤 各各 師子座애 아ᇇ거시ᄂᆞᆯ 보시며
皆聞諸佛與欲同開寶塔。卽從座起，住虛空中。
諸佛이 ᄒᆞᆫ가지로 寶塔 열오져 ᄒᆞ샤ᄆᆞᆯ 다 드르시고 즉재 座애셔 니르^샤 虛空 中에 住커시ᄂᆞᆯ
一切四衆，起立合掌，一心觀佛。
一切 四衆이 니러셔 合掌ᄒᆞ야 ᄒᆞᆫ ᄆᆞᅀᆞᄆᆞ로 부텨를 보ᅀᆞᆸ더니
於是釋迦牟尼佛，以右指開七寶塔戶，出大音聲，如卻關鑰開大城門。
그제 釋迦牟尼佛이 올ᄒᆞᆫ 소ᇇ가라ᄀᆞ로 七寶塔 이플 여르시니 큰 音聲이 나ᄃᆡ 쇠 앗고 큰 城門 여ᄂᆞᆫ ᄃᆞᆺ ᄒᆞ더니
右表順道開發也。
올ᄒᆞᆫ 녀근 道ᄅᆞᆯ 順ᄒᆞ야 여러 내요ᄆᆞᆯ ^ 表ᄒᆞ시니라
卽時一切衆會，皆見多寶如來於寶塔中坐師子座，全身不散，如入禪定。
卽時예 一切 衆會 다 보ᅀᆞᄫᅩᄃᆡ 多寶如來 寶塔 中에 師子座애 안ᄌᆞ샤 全身이 흗디 아니ᄒᆞ샤 禪定에 드르신 ᄃᆞᆺ ᄒᆞ며
又聞其言：
ᄯᅩ 그 마ᄅᆞᆯ 듣ᄌᆞᄫᅩᄃᆡ
「善哉，善哉！釋迦牟尼佛！快說是法華經，我爲聽是經故而來至此。」
됴타 됴타 釋迦牟尼佛이 이 法華經을 훤히 니ᄅᆞ시^ᄂᆞ니 내 이 經 드로ᄆᆞᆯ 爲ᄒᆞ야 이ᅌᅦ 오라
信知諸佛雖不實滅。而言滅度。
諸佛이 비록 眞實로 滅度 아니ᄒᆞ샤도 滅度 니ᄅᆞ샤ᄆᆞᆯ 眞實로 알리로다
爾時四衆等、見過去無量千萬億劫滅度佛說如是言，
그ᄢᅴ 四衆 等이 過去 無量 千萬億 劫 滅度佛이 이 말 니ᄅᆞ거시ᄂᆞᆯ 보ᅀᆞᆸ고
歎未曾有，以天寶華聚，散多寶佛及釋迦牟尼佛上。
녜 업던 이리로다 讚歎ᄒᆞ야 하ᄂᆞᆳ 寶華聚로 多寶佛^와 釋迦牟尼佛ㅅ 우희 비터니
爾時多寶佛，於寶塔中分半座與釋迦牟尼佛，而作是言：
그ᄢᅴ 多寶佛이 寶塔 中에 半座 ᄂᆞᆫ호샤 釋迦牟尼佛ᄭᅴ 받ᄌᆞᄫᆞ시고 니ᄅᆞ샤ᄃᆡ
「釋迦牟尼佛！可就此座。」
釋迦牟尼佛이 이 座애 안ᄌᆞ쇼셔
卽時釋迦牟尼佛入其塔中，坐其半座，結加趺坐。
卽時예 釋迦牟尼佛이 塔 中에 드르샤 半^座애 안ᄌᆞ샤 結加趺坐ᄒᆞ시니라
妙法實際一切圓融。物我不分古今一致。
妙法 實ᄒᆞᆫ ᄀᆞᅀᆞᆫ 一切 두려ᄫᅵ 노가 物와 나왜 ᄂᆞᆫ홈 업스며 녜와 이제왜 ᄒᆞᆫ 가질ᄊᆡ
是以過去多寶與現在釋迦。於寶塔中共坐一座。
過去 多寶와 現在 釋迦ㅣ 寶塔 中에 ᄒᆞᆫ 座애 어우러 안ᄌᆞ샤
以示三界之相無有生死若退若出。
三界相이 生死와 믈롬과 남괘 업스며
亦無在世及滅度者。
ᄯᅩ 世間애 이시며 滅度ᄒᆞ니 업스며
非實非虗非如非異。
實 아니며 虛 아니며 如 아니며 異 아닌 ᄃᆞᆯ 뵈시니
斯妙法之極致也。故作證如此。
이 妙法의 至極ᄒᆞᆫ ᄯᅡ히라 그럴ᄊᆡ 證 ᄃᆞ외샤미 이러ᄒᆞ시니라
爾時，大衆見二如來在七寶塔中師子座上、結加趺坐，各作是念：
그ᄢᅴ 大衆^이 두 如來 七寶塔 中에 겨샤 師子座 우희 結加趺坐ᄒᆞ얫거시ᄂᆞᆯ 보ᅀᆞᆸ고 各各 너교ᄃᆡ
「佛座高遠，唯願如來以神通力，令我等輩俱處虛空。」
부텨 안ᄌᆞ신 ᄃᆡ 놉고 머니 願ᄒᆞᆫᄃᆞᆫ 如來神通力으로 우리ᄃᆞᆯᄒᆞᆯ 다 虛空애 잇게 ᄒᆞ시과뎌 ᄒᆞ더니
卽時釋迦牟尼佛、以神通力，接諸大衆皆在虛空，以大音聲普告四衆：
卽時예 釋迦牟^尼佛이 神通力으로 大衆을 자ᄇᆞ샤 다 虛空애 잇게 ᄒᆞ시고 큰 音聲으로 四衆의게 너비 니ᄅᆞ샤ᄃᆡ
「誰能於此娑婆國土廣說妙法華經，今正是時。
뉘 能히 이 娑婆國土애 妙法華經을 너비 니ᄅᆞ료 이제 正히 이 時節이니
如來不久當入涅槃，佛欲以此妙法華經付囑有在。」
如來 아니 오라 涅槃애 ^ 들리니 부톄 이 妙法華經으로 付囑호ᇙ ᄃᆡ 잇게 코져 ᄒᆞ노라
說證事圓於是付囑。
니ᄅᆞ시며 證ᄒᆞ시논 이리 圓ᄒᆞᆯᄊᆡ 이제 付囑ᄒᆞ시니
言有在者。傳布法利期在得人也。
잇다 ᄒᆞ샤ᄆᆞᆫ 法利ᄅᆞᆯ 傳持ᄒᆞ야 펴ᇙ딘댄 모로매 사ᄅᆞᆷ 어두려 ᄒᆞ시니라
日月燈明說是經已。即於眾唱滅授記付托。
日月燈明이 이 經 니ᄅᆞ시고 한 사ᄅᆞᄆᆡ게 滅度호려 니ᄅᆞ샤 授記ᄒᆞ야 付托ᄒᆞ시고
托은 브틸씨라
今佛至此。亦云不久涅槃付囑有在。
이젯 부톄 이ᅌᅦ 니르르샤 ᄯᅩ 아니 오라 涅槃호려 ᄒᆞ샤 付囑호ᇙ ᄃᆡ 잇게 호려 ᄒᆞ시니
足知三周開示至此乃畢。
三周 여러 뵈샤미 이ᅌᅦ 다ᄃᆞ라 ᄆᆞᄎᆞ신 ᄃᆞᆯ 아라ᇙ 디로다
此後顯妙勸持別是一番。故雖唱滅結經。而復有後說至神力品。涌出之眾方請流通。
이 後에 妙ᄅᆞᆯ 現ᄒᆞ시며 디뉴믈 勸ᄒᆞ샤미 各別히 ᄒᆞᆫ 番일ᄊᆡ 비록 滅度ᄅᆞᆯ 니ᄅᆞ샤 經을 ᄆᆡᄌᆞ샤도 ᄯᅩ 後ㅅ 마리 겨시니
則神力品前猶屬正宗明矣。此乃經之節目歷然可辨。
神力品에 다ᄃᆞ라ᅀᅡ 소사난 衆이 流通ᄋᆞᆯ 請ᄒᆞ면 神力品 前은 ᄉᆞᆫᄌᆡ 正宗에 屬호미 ᄇᆞᆯᄀᆞ니라
잇ᄀᆞ자ᇰ 見寶塔品 ᄆᆞᆺ고 아래ᄂᆞᆫ 提婆達多品이니
提婆達多亦曰調達。此云天授。為斛飯王子禱天而生也。昔為仙人授佛妙法。如來因之遂致成佛。
提婆達多ㅣ 녜 仙人이 ᄃᆞ^외야 부텻긔 妙法을 심기ᅀᆞᄫᅡᄂᆞᆯ 如來 因ᄒᆞ샤 成佛ᄒᆞ실ᄊᆡ
今欲明其所授而顯法妙利。故以名品。
이제 심기ᅀᆞᄫᆞᆫ 法을 ᄇᆞᆯ기샤 法의 妙利ᄅᆞᆯ 나토고져 ᄒᆞ실ᄊᆡ 品 일훔 지ᄒᆞ니라
月印千江之曲第十五
釋譜詳節第十五
揔八十七張