석보상절 3권
爲諸童子
太子ㅣ 아ᄒᆡᄃᆞᆯ 더브러 겨샤
一一分別諸字本末。
글왌 根源을 子細히 니ᄅᆞ시고
勸發無上正眞道意。
無上正眞道理ᄅᆞᆯ 勸ᄒᆞ시더라
上ᄋᆞᆫ 우히니 無上正眞道理ᄂᆞᆫ 우 업슨 正ᄒᆞᆫ 진딧 道理라
瑞應本起云。時去聖久書缺二字。
그ᄢᅴ 冊앳 두 字ㅣ ᄒᆞ야디여 아모도 모ᄅᆞ더니
以問於師。師不能達。
蜜多羅^도 모ᄅᆞ거늘
反啟其志。
太子ㅣᅀᅡ ᄀᆞᄅᆞ치시더라
時諸力士釋種長者啟白淨王。
力士ᄃᆞᆯ콰 釋種 長者ᄃᆞᆯ히 王ᄭᅴ ᄉᆞᆯᄫᅩᄃᆡ
釋種 長者ᄂᆞᆫ 釋氏ㅅ 얼우니라
若太子作佛斷聖王種。
太子ㅣ 부톄 ᄃᆞ외시면 聖王ㄱ 子孫이 그츠시리ᅌᅵ다
王曰。
王이 니ᄅᆞ샤ᄃᆡ
何所王女宜太子妃。
엇더늬 ᄯᆞ리ᅀᅡ 太子ㅅ 妃子ㅣ ᄃᆞ외려뇨
使上工立妙金像。
太子ㅣ 金으로 겨지븨 야ᇰᄌᆞᄅᆞᆯ ᄆᆡᇰ^ᄀᆞᄅᆞ시고
以書文字。
겨지븨 德을 쓰샤
女人德義如吾所疏。能應娉耳。
이 ᄀᆞᆮᄒᆞ야ᅀᅡ 妃子ᄅᆞᆯ 사모리라 ᄒᆞ시니
時白淨王告右梵志
王이 左右 梵志ᄅᆞᆯ 브리샤
入迦夷衛國遍瞻察。
두루 가 어드라 ᄒᆞ시니
梵志周行睹一玉女。淨猶蓮花。類玉女寶。王問女。梵志報曰。
ᄒᆞᆫ 玉女 ᄀᆞᄐᆞ시니ᄅᆞᆯ 보ᅀᆞᆸ고 와 ᄉᆞᆯᄫᅩᄃᆡ
執杖釋種。
執杖釋의 ᄯᆞ니미 겨시더ᅌᅵ다
王言。
王이 ᄒᆞ샤ᄃᆡ
儻不可意使自擇之。
ᄒᆞ다가 제 ᄠᅳ데 몯 마자도 저를 ᄀᆞᆯᄒᆡ에 호리^라 ᄒᆞ시고
召羅衛好女會彼講堂。
나랏 고ᄫᆞᆫ 겨지블 다 太子ㅅ 講堂애 모도시니
講ᄋᆞᆫ 글 닐거 ᄠᅳᆮ ᄎᆞᄌᆞᆯ씨니 講堂ᄋᆞᆫ 글 講ᄒᆞ시ᄂᆞᆫ 지비라
時釋女俱夷到菩薩所。
그저긔 그 ᄯᆞᆯ 俱夷도 講堂애 오샤
諦視菩薩目未曾眴。
太子ᄅᆞᆯ ᄲᅡᆯ아 보ᅀᆞᆸ거시ᄂᆞᆯ
菩薩欣笑。執持寶英以遺俱夷。
太子ㅣ 우ᅀᅳ시고 보ᄇᆡ옛 水精을 아ᅀᅡ 주신대
俱夷報曰。
俱夷 ᄉᆞᆯᄫᅩ샤ᄃᆡ
吾不貪寶。當以功德莊嚴。
나ᄂᆞᆫ 보ᄇᆡᄅᆞᆯ 아니 과ᄒᆞ야 功德으로 莊嚴ᄒᆞ노^ᅌᅵ다
王遣梵志往媒此女。
王이 梵志ᄅᆞᆯ 이 각싯 지븨 브리신대
執杖釋言。
執杖釋이 닐오ᄃᆡ
我等本姓有藝術者乃嫁與之。
우리 가문앤 ᄌᆡ조 ᄀᆞᆯᄒᆡ야ᅀᅡ 사회 맛ᄂᆞ니ᅌᅵ다
王問菩薩。
王이 太子ᄭᅴ 묻ᄌᆞᄫᅩ샤ᄃᆡ
能現術乎。
ᄌᆡ조ᄅᆞᆯ 어루 ᄒᆞᇙ다
菩薩曰
對答ᄒᆞ샤ᄃᆡ
能。
어루 호리ᅌᅵ다
王遍敕國中。撞鍾擊鼓。
王이 붑 텨 ᄌᆡ조 겻그ᇙ 사ᄅᆞᄆᆞᆯ 다 모ᄃᆞ라 ᄒᆞ시고 出令ᄒᆞ샤ᄃᆡ
却後七日太子現術。諸有藝術皆來集會。勝者以釋女與之。
ᄌᆡ조 이긔니ᅀᅡ 執杖釋^의 사회 ᄃᆞ외리라
調達이 닐오ᄃᆡ
太子ㅣ 聰明ᄒᆞ야 그른 잘 ᄒᆞ거니와 히미ᅀᅡ 어듸ᄯᅥᆫ 우리ᄅᆞᆯ 이긔료 ᄒᆞ고
於是調達右手牽象左手撲殺。
象이 門ᄋᆡ 솃거늘 그 象ᄋᆡ 머리ᄅᆞᆯ 자바 ᄯᅡ해 그우리왇고
難陀出城門。卽牽移路側。
難陀ᄂᆞᆫ 象ᄋᆞᆯ 긼 ᄀᆞᅀᅢ 티차ᄂᆞᆯ
菩薩出城曰。是象身大臭熏城內。
太子ᄂᆞᆫ 象ᄋᆞᆯ 드러 城 나ᄆᆞ티시고
卽右掌接擿置城外。
미처 ᄃᆞ라 가 바다 알피 아니 디게 ᄒᆞ시니라
調達이와 難陀왜 서르 실흠ᄒᆞ니 둘희 히미 ᄀᆞᆮ거늘
太子ㅣ 둘흘 자바 ᄒᆞᆫᄢᅴ 그우리와ᄃᆞ시며
時大臣炎光算術第一。
大臣 炎光이라 호리
大臣ᄋᆞᆫ 큰 신하ㅣ라
八萬異術一切諳會。
八萬 가짓 ᄌᆡ조 호ᄃᆡ
不及菩薩。
太子ᄭᅴ 계우ᅀᆞᄫᆞ니라
王及釋種更欲試射。
王이 釋種 ᄃᆞ리시고 ᄯᅩ 활 쏘기ᄅᆞᆯ 받더시니
그 東山애 金붑 銀붑 돌붑 쇠부피 各^各 닐굽곰 잇거늘
調達豎四十里鼓。難陀六十里。
調達이와 難陀왜 몬져 쏘니 各各 세콤 ᄢᅦ여디거늘
菩薩引弓。弓卽折破。
太子ㅣ 화ᄅᆞᆯ ᅘᅧ시니 화리 것거디거늘
問有異弓任吾用不。
무르샤ᄃᆡ 내 그ᅌᅦ 마ᄌᆞᆫ 화리 잇ᄂᆞ니여
王曰。
王이 니ᄅᆞ샤ᄃᆡ
吾祖父所執用弓奇異無雙。
우리 祖上애셔 쏘더신 화리 ᄀᆞ초아 이쇼ᄃᆡ
祖ᄂᆞᆫ 한아비니 祖上ᄋᆞᆫ 한아비롯 우흘 無數히 티닐온 마리라
無能用者。著於天寺便可持來。
이긔여 쏘리 업스니 가져 오라 ᄒᆞ^야시ᄂᆞᆯ
一切諸釋無能張者。
釋種ᄃᆞᆯ히 이긔여 지ᄒᆞ리 업더니
菩薩以手捺張。
太子ㅣ 소ᄂᆞ로 눌러 지ᄒᆞ샤
拼弓之聲悉聞城內。
시울 ᄩᆞ시ᇙ 소리 잣 안히 다 들이더라
注箭放撥
살 머겨 쏘시니
中百里鼓。箭沒地中涌泉自出。
그 사리 스믈여듧 부플 다 ᄢᅦ여 ᄯᅡ해 ᄉᆞᄆᆞ차 가아
中鐵圍山。
鐵圍山애 바ᄀᆞ니
三千剎土六反震動。一切諸釋怪未曾有。
三千 世界 드러치니라
天帝釋이 그 사ᄅᆞᆯ ᄲᅡᅘᅧ
忉利天에 가아 塔 일어 供^養ᄒᆞᅀᆞᆸ더라
이 塔ᄋᆞᆫ 天上 네 塔앳 ᄒᆞ나히라
살 든 굼긔셔 ᄉᆡ미 나아 우므리 ᄃᆞ외니
마시ᄃᆞᆫ 수을 ᄀᆞᆮ더니 머그면 病이 다 됴터라
於時執杖釋種以女俱夷爲菩薩妃。隨世習俗現相娛樂。
그제ᅀᅡ 執杖釋의 ᄯᆞ리 太子ㅅ 妃子ㅣ ᄃᆞ외시니라
ᄌᆡ조 겻구시ᇙ 제 부텻 나히 열히러시니 昭王ㄱ 셜흔다ᄉᆞ찻 ᄒᆡ 癸亥오
妃子 드리샤ᄆᆞᆫ 부텻 나히 열닐구비러시니 昭王 마ᅀᆞᆫ둘찻 ᄒᆡ 庚午ㅣ라
太子雖納久而不接。
太子ㅣ 妃子ᄅᆞᆯ 드리샤^도 ᄌᆞ올아ᄫᅵ 아니ᄒᆞ더시니
婦人之情欲有附近。
俱夷 ᄠᅳ덴 갓가ᄫᅵ 가ᅀᆞᆸ고져 ᄒᆞ실ᄊᆡ
太子曰。
太子ㅣ ᄒᆞ샤ᄃᆡ
常得好花置我中間。共視之寧不好乎。
됴ᄒᆞᆫ 고ᄌᆞᆯ 우리 ᄉᆞᅀᅵ예 노코 보ᄃᆡ 아니 됴ᄒᆞ니여
裘夷卽具好花。又欲近之。
俱夷 고ᄌᆞᆯ 가져다가 노코 ᄯᅩ 나ᅀᅡ오려 커시ᄂᆞᆯ
太子曰却。
太子ㅣ ᄒᆞ샤ᄃᆡ
此花汁污於床席。
고ᄌᆡᆺ 이스리 저즈리라
久後復曰。得好白褺置我中間。兩人觀之不亦好乎。
後에 ᄯᅩ 白氎을 ᄉᆞᅀᅵ예 노하 두고 보더시니
白氎은 ᄒᆡᆫ 木綿이니 西天 마래 ^ 迦波羅ㅣ라
婦卽具褺又有近意。
俱夷 ᄯᅩ 갓가ᄫᅵ 오러 커시ᄂᆞᆯ
太子曰却。
太子ㅣ ᄒᆞ샤ᄃᆡ
人有污垢必洿此褺。
白氎이 ᄠᆡ 무드리라 ᄒᆞ실ᄊᆡ
婦不敢近。
갓가ᄫᅵ 몯 오더시다
太子出遊前至王田。息閻浮樹
太子ㅣ 나아 노니샤 閻浮樹 아래 가샤
받 가ᇙ 사ᄅᆞᆷ 보더시니
日光輝赫。樹爲曲枝蔭太子身。
나못 가지 구버 와 ᄒᆡᆺ 光ᄋᆞᆯ ᄀᆞ리더라
看諸耕人淨居天化爲死
淨居天 澡缾이 주근 벌에 ᄃᆞ외야 디옛거늘
淨은 조ᄒᆞᆯ씨오 居는 살씨니
貪慾^ᄋᆞᆯ 여희여 조ᄒᆞᆫ 몸 사ᄂᆞᆫ 하ᄂᆞᆯ히니
無煩天과 無熱天과 善見天과 善現天과 色究竟天이라
澡缾은 일후미라
蟲烏隨啄吞。
가마괴 와 딕먹더니
見已起慈逮得四禪。
太子ㅣ 보시고 慈悲心ᄋᆞᆯ 내야시ᄂᆞᆯ
王尋後至慰引將還。
王이 미조차 가샤 달애야 뫼셔 오샤
慮其出家
出家ᄒᆞ시ᇙ가 저흐샤
更增妓女娛樂衆具令其心止。
푸ᇰ류ᄒᆞᇙ 겨집 더ᄒᆞ야 ᄆᆞᅀᆞᄆᆞᆯ 자치시긔 ᄒᆞ시더라
太子ㅣ 門 밧글 보아지라 ᄒᆞ야시ᄂᆞᆯ
王^이 臣下ᄃᆞᆯᄒᆞᆯ 긔걸ᄒᆞ샤