석보상절 9권
罪 니블 ᄆᆞᄃᆡ며 녀나ᄆᆞᆫ 그지업슨 어려ᄫᅳᆫ 일와 辱ᄃᆞᄫᆡᆫ 일와
悲愁煎迫身心受苦。
슬픈 일와 시름다ᄫᆞᆫ 이리 다와댓거든
若聞我名以我福德威神力故。
내 ^ 일후믈 드르면 내 福德威神力으로
皆得解脫一切憂苦。
一切 受苦ᄅᆞᆯ 다 버서나긔 호리라
第十一大願。願我來世得菩提時。
第十一 大願은 내 來世예 菩提 得ᄒᆞᆫ 時節에
若諸有情飢渴所惱爲求食故造諸惡業。
ᄒᆞ다가 有情이 주으려 밥 얻고져 ᄒᆞ야 모딘 罪ᄅᆞᆯ 지ᅀᅳᆯ ᄆᆞᄃᆡ예
得聞我名專念受持。
내 일후믈 드러 닛디 아니ᄒᆞ야 디니면
我當先以上妙飲食飽足其身。
내 몬져 됴ᄒᆞᆫ 차바ᄂᆞ로 ᄇᆡ브르긔 ^ ᄒᆞ고ᅀᅡ
後以法味畢竟安樂而建立之。
法味로 乃終에 便安코 즐겁긔 호리라
法味ᄂᆞᆫ 法 마시라
第十二大願。願我來世得菩提時。
第十二 大願은 내 來世예 菩提 得ᄒᆞᆫ 時節에
若諸有情貧無衣服蚊虻寒熱晝夜逼惱。
ᄒᆞ다가 有情이 오시 업서 모ᄀᆡ 벌에며 더ᄫᅱ 치ᄫᅱ로 셜ᄫᅥᄒᆞ다가
若聞我名專念受持。
내 일후믈 드러 닛디 아니ᄒᆞ야 디니면
如其所好卽得種種上妙衣服。
제 맛드논 야ᅌᆞ로 種種앳 됴ᄒᆞᆫ 오ᄉᆞᆯ 어드며
亦得一切寶莊嚴具華鬘塗香鼓樂衆伎隨心所翫皆令滿足。
ᄯᅩ ^ 보ᄇᆡ옛 莊嚴이며 花香 伎樂ᄋᆞᆯ ᄆᆞᅀᆞᆷ 조초 ᄀᆞ초 얻긔 호리라 ᄒᆞ더시니
曼殊室利 是爲 彼世尊 藥師琉璃光如來 應正等覺行菩薩道時 所發十二微妙上願。
文殊師利여 뎌 藥師瑠璃光如來ㅅ 十二 微妙上願이시니라
上願은 위두ᄒᆞᆫ 願이라
復次 曼殊室利。彼世尊 藥師琉璃光如來 行菩薩道時
ᄯᅩ 文殊師利여 뎌 藥師瑠璃光如來 菩薩ㅅ 道理 行ᄒᆞ시ᇙ 時^節에
所發大願及彼佛土功德莊嚴。
發ᄒᆞ샨 큰 願과 뎌 부텻 나라햇 功德莊嚴을
我若一劫若一劫餘說不能盡。
내 ᄒᆞᆫ 劫이며 ᄒᆞᆫ 劫이 남ᄃᆞ록 닐어도 몯 다 니르리어니와
然彼佛土 一向淸淨
그러나 뎌 부텻 ᄯᅡ히 雜말 업시 淸淨ᄒᆞ고
無有女人 亦無惡趣 及苦音聲。
겨지비 업스며 惡趣ㅣ며 受苦ᄅᆞᄫᆡᆫ 소리 업고
惡趣는 머즌 길히니 地獄 餓鬼 畜生이라
琉璃爲地 金繩界道
瑠璃 ᄯᅡ히 ᄃᆞ외오 金 노ᄒᆞ로 길흘 느^리고
城闕宮閣 軒窗羅網 皆七寶成。
城이며 지비며 羅網이 다 七寶로 이러 이쇼미
亦如西方 極樂世界 功德莊嚴 等無差別。
ᄯᅩ 西方 極樂世界와 ᄀᆞᆮᄒᆞ야 ᄀᆞᆯᄒᆡ요미 업고
於其國中 有二菩薩摩訶薩。
그 나라해 두 菩薩摩訶薩이 이쇼ᄃᆡ
一名日光遍照。二名月光遍照。
ᄒᆞᆫ 일후믄 日光遍照ㅣ오 ᄒᆞᆫ 일후믄 月光遍照ㅣ니
是彼 無量無數 菩薩衆之上首。
뎌 無量無數 菩薩衆에 위두ᄒᆞ야 잇ᄂᆞ니
諸有信心 善男子善女人等
이럴^ᄊᆡ 信心 뒷ᄂᆞᆫ 善男子 善女人이
信心ᄋᆞᆫ 믿ᄂᆞᆫ ᄆᆞᅀᆞ미라
應當願生 彼佛世界。
뎌 부텻 世界예 나고져 發願ᄒᆞ야ᅀᅡ ᄒᆞ리라
爾時世尊 復告曼殊室利 童子言。
그ᄢᅴ 世尊이 ᄯᅩ 文殊師利ᄃᆞ려 니ᄅᆞ샤ᄃᆡ
曼殊室利。有諸衆生 不識善惡
文殊師利여 믈읫 衆生이 됴ᄒᆞ며 구즌 이ᄅᆞᆯ 모ᄅᆞ고
唯懷貪吝。
오직 貪ᄒᆞ며 앗가ᄫᆞᆫ ᄆᆞᅀᆞᄆᆞᆯ 머거
不知布施 及施果報。愚癡無智 闕於信根。
布施홈과 布施ᄒᆞ^ᄂᆞᆫ 果報ᄅᆞᆯ 몰라
多聚財寶 勤加守護。
쳔랴ᅌᆞᆯ 만히 뫼호아 두고 受苦ᄅᆞᄫᅵ 딕희여 이셔
見乞者來 其心不喜。設不獲已 而行施時。
빌 리 잇거든 츠기 너겨 모지마라 주ᇙ 디라도
如割身肉 深生痛惜。
제 모맷 고기ᄅᆞᆯ 바혀 내논 ᄃᆞ시 너겨ᄒᆞ며
復有無量 慳貪有情 積集資財。
ᄯᅩ 貪ᄒᆞᆫ 無量 有情이 쳔랴ᅌᆞᆯ 모도아 두고
於其自身 尚不受用。
제 ᄡᅮᆷ도 오히려 아니ᄒᆞ거니
何況能與 父母妻子 奴婢作使
ᄒᆞᄆᆞᆯ며 어버ᅀᅵᆫᄃᆞᆯ 내야 주며 가시며 子息이며 죠ᅌᅵᆫᄃᆞᆯ 주며
及來乞者。
와 ^ 비ᄂᆞᆫ 사ᄅᆞᄆᆞᆯ 주리여
彼諸有情 從此命終
이런 有情ᄃᆞᆯᄒᆞᆫ 이ᅌᅦ셔 주그면
生餓鬼界 或傍生趣。
餓鬼어나 畜生이어나 ᄃᆞ외리니
由昔人間 曾得暫聞 藥師琉璃光如來名故。
人間애 이셔 藥師瑠璃光如來ㅅ 일후믈 잠ᄭᅡᆫ 듣ᄌᆞᄫᆞᆫ 젼ᄎᆞ로
今在惡趣 暫得憶念 彼如來名。
惡趣예 이셔도 뎌 如來ㅅ 일후믈 잠ᄭᅡᆫ ᄉᆡᇰ각ᄒᆞ면
卽於念時 從彼處沒 還生人中。得宿命念
즉자히 뎌ᅌᅦ셔 업서 도로 人間애 나아
畏惡趣苦 不樂欲樂 好行惠施 讚歎施者。
惡趣의 受苦^ᄅᆞᆯ 저허 貪欲ᄋᆞᆯ 즐기디 아니ᄒᆞ고
一切所有 悉無貪惜。
布施ᄅᆞᆯ 즐겨 뒷논 거슬 앗기디 아니ᄒᆞ야
漸次尚能以頭目手足血肉身分
머리며 누니며 손바리며 모맷 고기라도 비ᄂᆞᆫ 사ᄅᆞᄆᆞᆯ 주리어니
施來求者況餘財物。
ᄒᆞᄆᆞᆯ며 녀나ᄆᆞᆫ 쳔랴ᅌᅵᄯᆞ녀
復次曼殊室利。若諸有情雖於如來受諸學處而破尸羅。
ᄯᅩ 文殊師利여 믈읫 有情이 비록 如來ᄭᅴ 道理 ᄇᆡ호다가도 尸羅ᄅᆞᆯ 헐며
尸羅ᄂᆞᆫ 淸淨ᄒᆞᆫ 戒라 ᄒᆞ논 마리라
有雖不破尸羅而破軌則。
尸^羅ᄅᆞᆯ 아니 허러도 軌則을 헐며
軌則은 法이니 擧動ᄋᆞᆯ 니르니라
有於尸羅軌則雖得不壞然毀正見。
尸羅 軌則을 아니 허러도 正ᄒᆞᆫ 보ᄆᆞᆯ 헐며
有雖不毀正見而棄多聞。
正ᄒᆞᆫ 보ᄆᆞᆯ 아니 허러도 해 드로ᄆᆞᆯ ᄇᆞ려
於佛所說契經深義不能解了。
부텨 니ᄅᆞ샨 經엣 기픈 ᄠᅳ들 아디 몯ᄒᆞ며
有雖多聞而增上慢。
비록 해 드러도 增上慢ᄒᆞ며
增은 더을씨오 慢ᄋᆞᆫ ᄂᆞᆷ 므더니 너길씨니 몯 得혼 法을 得호라 ᄒᆞ며
몯 證혼 道理ᄅᆞᆯ 證호라 ᄒᆞ야
제 實엔 사오나ᄫᅩ^ᄃᆡ 웃사ᄅᆞᆷ두고 더은 야ᇰ ᄒᆞ야
法 므더니 너기며 사ᄅᆞᆷ 므더니 너길씨 增上慢이라
由增上慢覆蔽心故
增上慢ᄒᆞ논 젼ᄎᆞ로 ᄆᆞᅀᆞ미 ᄀᆞ리ᄂᆞ니
自是非他
그럴ᄊᆡ 제 올호라 ᄒᆞ고 ᄂᆞᄆᆞᆯ 외다 ᄒᆞ야
嫌謗正法爲魔伴黨。
正法을 비우ᅀᅥ 魔ᄋᆡ ᄒᆞᆫ 黨이 ᄃᆞ외리니
如是愚人自行邪見
이런 어린 사ᄅᆞᄆᆞᆫ 제 邪曲ᄒᆞᆫ 보ᄆᆞᆯ ᄒᆞ고
復令無量俱胝有情墮大險坑。
ᄯᅩ 無量 有情이 큰 어려ᄫᅳᆫ 구데 ᄠᅥ러디긔 ᄒᆞᄂᆞ니
此諸有情應於地獄傍生鬼趣流轉無窮。
이런 有情ᄃᆞᆯ히 地^獄 餓鬼 畜生애 그지업시 두루 ᄃᆞᆮ니다가
若得聞此藥師琉璃光如來名號。
이 藥師瑠璃光如來ㅅ 일후믈 듣ᄌᆞᄫᆞ면
便捨惡行修諸善法不墮惡趣。
모딘 ᄒᆡᇰ뎌글 ᄇᆞ리고 됴ᄒᆞᆫ 法을 닷가 惡趣예 아니 디리니
設有不能捨諸惡行修行善法墮惡趣者。
비록 모딘 ᄒᆡᇰ뎍 ᄇᆞ리고 됴ᄒᆞᆫ 法 닷고ᄆᆞᆯ 몯ᄒᆞ야 惡趣예 ᄠᅥ러디고도
以彼如來本願威力令其現前暫聞名號
뎌 如來ㅅ 本願威力으로 알ᄑᆡ 뵈샤 일후^믈 자ᇝ간 들이시면
從彼命終還生人趣。
뎌ᅌᅦ셔 주거 도로 人間애 나아 出家ᄒᆞ야
得正見精進善調意樂便能捨家趣於非家。如來法中受持學處無有毀犯。正見多聞解甚深義。
正ᄒᆞᆫ 보ᄆᆞᆯ 허디 아니ᄒᆞ며 해 드러 기픈 ᄠᅳ들 알며
離增上慢不謗正法。
增上慢ᄋᆞᆯ 여희여 正法을 비웃디 아니ᄒᆞ야
不爲魔伴漸次修行諸菩薩行速得圓滿。
魔ᄋᆡ 버디 아니 ᄃᆞ외야 漸漸 修行ᄒᆞ야 圓滿ᄋᆞᆯ ᄲᆞᆯ리 得ᄒᆞ리라
復次曼殊室利。若諸有情慳貪嫉妒
ᄯᅩ 文殊師利여 믈읫 有情이 貪^ᄒᆞ고
自讚毀他。
새옴ᄇᆞᆯ라 제 모ᄆᆞᆯ 기리고
當墮三惡趣中無量千歲受諸劇苦。
ᄂᆞᄆᆞᆯ 허러 三惡趣예 ᄠᅥ러디여 無量千歲ᄅᆞᆯ 受苦ᄒᆞ다가
受劇苦已從彼命終來生人間作牛馬駝驢
뎌ᅌᅦ셔 주거 人間애 나고도 ᄉᆈ어나 ᄆᆞ리어나 약대어나 라귀어나 ᄃᆞ외야
恒被鞭撻飢渴逼惱。
長常 채 맛고 주으륨과 목ᄆᆞᆯ로ᄆᆞ로 受苦ᄒᆞ며
又常負重隨路而行
ᄯᅩ 長常 므거ᄫᅳᆫ 거슬 지여 길흘 조차 ᄃᆞᆮ니다가
或得爲人
시혹 사ᄅᆞ^미 ᄃᆞ외오도
生居下賤作人奴婢
ᄂᆞᆺ가ᄫᆞᆫ ᄂᆞᄆᆡ 죠ᅌᅵ ᄃᆞ외야
受他驅役恒不自在。
ᄂᆞᄆᆡ 브룐 일 ᄃᆞᆮ녀 샤ᇰ녜 自得디 몯ᄒᆞ리니
若昔人中
ᄒᆞ다가 아래 人間애 이시ᇙ 저긔
曾聞世尊藥師琉璃光如來名號。
藥師瑠璃光如來ㅅ 일후믈 듣ᄌᆞᄫᅢᆺ단 디면