월인석보 12권
月印千江之曲第十二
釋譜詳節第十二
其二百七十六
長者ㅣ 지븻 블을 子息이 아니 저ᄒᆞᆯᄊᆡ
아ᄇᆡ 말ᄋᆞᆯ 몰라 드르니
世間 煩惱ㅅ 블을 衆生이 아니 저ᄒᆞᆯᄊᆡ
부텻 말ᄋᆞᆯ 몰라 듣^ᄌᆞᄫᆞ니
其二百七十七
어료미 뎌러ᄒᆞᆯᄊᆡ
아비 分別ᄒᆞ야 거즛말로 달애니ᅌᅵ다
迷惑이 이러ᄒᆞᆯᄊᆡ
부톄 分別ᄒᆞ샤 方便으로 ᄀᆞᄅᆞ치시니ᅌᅵ다
其二百七十八
세 술윌 주려 ᄒᆞ야
블 밧긔 나거ᅀᅡ 큰 술위ᄅᆞᆯ 주어 깃기니
三乘ᄋᆞᆯ 니ᄅᆞ샤
三界 밧긔 나거ᅀᅡ 一乘ᄋᆞᆯ 닐어 들이시니
爾時舍利弗踊躍歡喜，
그ᄢᅴ 舍利弗이 ᄂᆞ소사 기ᄭᅥ
即起合掌，
즉자히 니러 合掌ᄒᆞ야
瞻仰尊顏而白佛言：
尊顔ᄋᆞᆯ ^ 울워ᅀᆞᄫᅡ ᄉᆞᆯᄫᅩᄃᆡ
尊顔ᄋᆞᆫ 尊ᄒᆞ신 ᄂᆞ치라
「今從世尊聞此法音，
오ᄂᆞᆳ날 이런 法音을 듣ᄌᆞᄫᅩ니
心懷勇躍，得未曾有。
ᄆᆞᅀᆞ미 踊躍ᄒᆞ야 녜 업던 이ᄅᆞᆯ 得과ᅌᅵ다
身子既悟法說。自知作佛故
舍利弗이 法說에 ᄒᆞ마 아라 부텨 ᄃᆞ외ᇙ ᄃᆞᆯ 제 알ᄊᆡ
踊躍而作慶所未聞。
踊躍ᄒᆞ야 니러 몯 듣던 이ᄅᆞᆯ 慶賀ᄒᆞ니라
慶賀ᄂᆞᆫ 깃게라 ᄒᆞᆯ씨라
所以者何？
엇뎨어뇨 ᄒᆞ란ᄃᆡ
我昔從佛聞如是法，
내 녜 부텨ᄭᅴ 이런 法을 듣ᄌᆞᄫᅩᄃᆡ
見諸菩薩授記作佛，
菩薩ᄃᆞᆯᄒᆞᆫ 受記^作佛 ᄒᆞ거시든 보ᅀᆞᆸ고
作佛은 부텨 ᄃᆞ외실씨라
而我等不豫斯事，
우리ᄂᆞᆫ 이 이레 隨參 몯ᄒᆞᅀᆞᄫᅡ
甚自感傷，失於如來無量知見。
如來ㅅ 無量 知見 일ᄊᆞᄫᅩᄆᆞᆯ 甚히 애ᄃᆞᅀᆞᄫᅡ ᄒᆞ다ᅌᅵ다
謂昔者方等會上共聞是法。
녜ᄂᆞᆫ 方等會ᄅᆞᆯ 니ᄅᆞ니라
無量知見即一乘正智也。
無量 知見은 곧 一乘 正智라
世尊！我常獨處山林樹下，
世尊하 내 샤ᇰ녜 묏수풀 아래 ᄒᆞ오ᅀᅡ 이셔
若坐若行，
아ᇇ거나 ᄃᆞᆮ니거나 호매
每作是念：
長常 너^교ᄃᆡ
『我等同入法性，
우리도 ᄒᆞᆫ가지로 法性에 드로ᄃᆡ
云何如來以小乘法而見濟度？
엇뎨 如來 小乘法으로 濟渡ᄒᆞ거시뇨 ᄒᆞ다니
是我等咎，
이 우리 허므리라
非世尊也。
世尊ㅅ 다시 아니ᄅᆞ샤ᄉᆡᅌᅵ다
所以者何？
엇뎨어뇨 ᄒᆞ란ᄃᆡ
若我等待說所因
우리옷 所因 니ᄅᆞ샤ᄆᆞᆯ 기드려
成就阿耨多羅三藐三菩提者，
阿耨多羅三藐三菩提ᄅᆞᆯ 일^우리런ᄃᆡᆫ
必以大乘而得度脫。
다ᇰ다ᅌᅵ 大乘으로 度脫ᄒᆞ시리어늘
然我等不解方便隨宜所說，
우리 方便으로 맛다ᇰᄒᆞᆯ 야ᅌᆞᆯ 조차 니르시논 마ᄅᆞᆯ 모ᄅᆞᅀᆞᄫᅡ
初聞佛法，
처ᅀᅥᆷ 부텻 法 듣ᄌᆞᆸ고
遇便信受、思惟、取證。』
곧 信ᄒᆞ야 受ᄒᆞᅀᆞᄫᅡ 證호라 ᄒᆞ다ᅌᅵ다
所因即般若實智為菩提正因也。
因은 곧 般若實智菩提正因이 ᄃᆞ외니라
佛固將說
부톄 쟈ᇰᄎᆞ 니ᄅᆞ시리어늘
而我不欵待。
내 기드리ᅀᆞᆸ디 아니ᄒᆞ고
但初聞四諦。即便信受
다ᄆᆞᆫ 四諦ᄅᆞᆯ 처ᅀᅥᆷ 듣ᄌᆞᆸ고 곧 信^受ᄒᆞ야
速取小果。
小果ᄅᆞᆯ ᄲᆞᆯ리 가죠라 ᄒᆞ야
葢自誤也。
제 외오 호라 ᄒᆞ니라
世尊！我從昔來，終日竟夜每自剋責，
世尊하 내 아래브터 져므ᄃᆞ록 새ᄃᆞ록 내 모ᄆᆞᆯ 구짓다니
而今從佛聞所未聞未曾有法，
오ᄂᆞᆯ 부텨ᄭᅴ 몯 듣ᄌᆞᆸ던 녜 업슨 法을 듣ᄌᆞᆸ고
斷諸疑悔，」
疑悔ᄅᆞᆯ 그처 ᄇᆞ려
悔ᄂᆞᆫ 뉘으츨씨라
身意泰然，快得安隱。
몸과 ᄠᅳᆮ괘 便安ᄒᆞ야 훤히 便安호ᄆᆞᆯ 得호니
今日乃知真是佛子，
오ᄂᆞᆳ날ᅀᅡ 眞實ㅅ 부텻 아ᄃᆞ리라
從佛口生，
부^텻 이블 從ᄒᆞ야 나며
從法化生，得佛法分。
法을 從ᄒᆞ야 化生ᄒᆞ야 부텻 法分을 得혼 ᄃᆞᆯ 알와ᅌᅵ다
口生者。因聞一音。
이브로 나다 호ᄆᆞᆫ ᄒᆞᆫ 소리 듣ᄌᆞᄫᅩᄆᆞᆯ 因ᄒᆞᆯ씨라
法生者。悟如是法。
法으로 나다 호ᄆᆞᆫ 如是法을 알씨라
法分者。得如來知見寶藏之分也。
法分은 如來ㅅ 知見寶藏ᄋᆡ 分이라
爾時佛告舍利弗：
그ᄢᅴ 부톄 舍利弗ᄃᆞ려 니ᄅᆞ샤ᄃᆡ
「吾今於天、人、沙門、婆羅門、等大眾中說，
내 오ᄂᆞᆯ 天 人 沙門 婆羅門 等 大衆 ^ 中에 니르노니
我昔曾於二萬億佛所，為無上道故，常教化汝，
내 녜 二萬億 부텨ᄭᅴ 無上道ᄅᆞᆯ 爲ᄒᆞ논 젼ᄎᆞ로 샤ᇰ녜 너를 敎化ᄒᆞ며
汝亦長夜隨我受學。
너도 長夜애 나ᄅᆞᆯ 조차 ᄇᆡ호거든
我以方便引導汝故，
내 方便으로 너를 引導ᄒᆞᆯᄊᆡ
生我法中。
내 法 中에 나앳ᄂᆞ니
長夜隨學。言正智未明。
長夜애 조차 ᄇᆡ호다 ᄒᆞ샤ᄆᆞᆫ 正智 ᄇᆞᆰ디 몯호ᄆᆞᆯ 니ᄅᆞ시니라
舍利弗！我昔教汝志願佛道，
舍利弗아 내 ^ 녜 너를 ᄀᆞᄅᆞ쳐 佛道ᄅᆞᆯ ᄠᅳ데 願케 호니
汝今悉忘，而便自謂已得滅度。
네 이제 다 닛고 ᄒᆞ마 滅度ᄅᆞᆯ 得호라 ᄒᆞᆯᄊᆡ
我今還欲令汝憶念本願所行道故，
네 本願에 行ᄒᆞ던 道ᄅᆞᆯ ᄉᆡᇰ각게 호려 ᄒᆞ야
為諸聲聞說是大乘經，
聲聞ᄃᆞᆯ 爲ᄒᆞ야 大乘經을 니르노니
名妙法蓮華，
일후미 妙法蓮華ㅣ니
教菩薩法、
菩薩 ᄀᆞᄅᆞ치논 法이며
佛所護念。
부텨 護^念ᄒᆞ논 배라
「舍利弗！
舍利弗아
汝於未來世，過無量無邊不可思議劫，
네 아니 왯ᄂᆞᆫ 뉘예 無量無邊 不可思議 劫을 디나
供養若干千萬億佛，
若干 千萬億 佛을 供養 ᄒᆞᅀᆞᄫᅡ
奉持正法，
正法을 바다 디녀
具足菩薩所行之道，
菩薩 行ᄒᆞ논 道ㅣ ᄀᆞ자
當得作佛，
부톄 ᄃᆞ외요ᄃᆡ
號曰華光如來、應供、正遍知、明行足、善逝世間解、無上士、調御丈夫、天人師、佛、世尊。
號ᄅᆞᆯ 華光如來 應供 ^ 正徧知 明行足 善逝 世間解 無上士 調御丈夫 天人師 佛 世尊이라 ᄒᆞ리니
既悟妙法當成佛道。
ᄒᆞ마 妙法을 아라 佛道ᄅᆞᆯ 일우릴ᄊᆡ
故得記作佛也。
記ᄅᆞᆯ 得ᄒᆞ야 부톄 ᄃᆞ외니라
諸授記文皆二。
授記文ᄃᆞᆯ히 다 두 가지니
初供佛行道因記也。
처ᅀᅥ믄 부텨 供養ᄒᆞᅀᆞᄫᆞ며 道理 行호미니 因記오
次十號劫國果記也。
버건 十號와 劫과 國괘니 果記라
此記大因大果。
이ᅌᅥ긔 大因 大果ᄅᆞᆯ 記^ᄒᆞ샤
以策進小乘也。
小乘을 나ᅀᅩ시니라
號華光者。
號ᄅᆞᆯ 華光이라 호ᄆᆞᆫ
華表因行
華ᄂᆞᆫ 因行ᄋᆞᆯ 表ᄒᆞ고
光能發明。
光ᄋᆞᆫ 能히 發明ᄒᆞᄂᆞ니
由最初領悟發明是道故也。
ᄆᆞᆺ 처ᅀᅥᆷ 領悟ᄒᆞ야 이 道ᄅᆞᆯ 發明ᄒᆞᆯᄊᆡ니라
領은 바ᄃᆞᆯ씨니 領悟ᄂᆞᆫ 아다 혼 마리라
發明은 ᄇᆞᆯ고ᄆᆞᆯ 낼씨라
既受佛記。
ᄒᆞ마 佛記ᄅᆞᆯ 受ᄒᆞᅀᆞᄫᅩᄃᆡ
猶過多劫然後得果者。
ᄉᆞᆫᄌᆡ 한 劫 디낸 後에ᅀᅡ 果 得호ᄆᆞᆫ
成佛由智
成佛호ᄆᆞᆫ 智ᄅᆞᆯ 븓고
得果由行。
果 得호ᄆᆞᆫ 行ᄋᆞᆯ 븓ᄂᆞ니
小乘雖悟實智。未修大行。
小乘이 비록 實智ᄅᆞᆯ 알오도 큰 行ᄋᆞᆯ 닷디 몯ᄒᆞ니
是謂素法身佛。
이ᄅᆞᆯ 닐온 素法身佛이^라
未有莊嚴。
莊嚴이 업슬ᄊᆡ
素ᄂᆞᆫ ᄒᆡᆯ씨라
故須經劫供佛行菩薩道。