월인석보 11권
ᄆᆞᆯᄀᆞᆫ 거시 흐리여 識이 發ᄒᆞ야 흘러 나 境에 갈씨 漏ㅣ라
諸漏者謂欲漏有漏無明漏。
諸漏는 欲漏와 有漏와 無^明漏왜니
欲漏는 無明 말오 欲界옛 一切 煩惱ㅣ오
有漏는 無明 말오 웃 兩界옛 一切 煩惱ㅣ오
無明漏는 三界옛 無明이라
皆以粘湛妄識爲體。
다 ᄆᆞᆯᄀᆞᆫ 거시 흐리여 거즛 識으로 읏드믈 사마
爲三界煩惱之本。
三界 煩惱ㅅ 根源이 ᄃᆞ외니
煩惱卽貪嗔癡等十使。爲諸漏之緣。
煩惱ᄂᆞᆫ 貪 嗔 癡 等 十使ㅣ 諸漏ㅅ 緣이 ᄃᆞ외야
戕害法身逼惱正性。
法身ᄋᆞᆯ ᄒᆞ야ᄇᆞ려 正ᄒᆞᆫ 性을 보찰ᄊᆡ
名煩惱賊。
煩惱賊이^라 ᄒᆞᄂᆞ니라
言漏盡無惱者。
漏ㅣ 다아 煩惱ㅣ 업다 호ᄆᆞᆫ
以本盡故緣無。
根源이 다ᄋᆞᆯᄊᆡ 緣이 업스니
是謂殺賊也。
이ᄅᆞᆯ 닐온 도ᄌᆞᆨ 주규미라
己利卽證智斷惑之事。
己利ᄂᆞᆫ 智ᄅᆞᆯ 證ᄒᆞ고 惑ᄋᆞᆯ 斷혼 이리니
斷ᄋᆞᆫ 그츨씨라
文句謂三界因果皆爲他事。
三界옛 因果ㅣ 다 ᄂᆞᆷ 爲혼 이리오
智斷功德乃名己利。
智斷功德이ᅀᅡ 己利라 ᄒᆞᄂᆞ니
逮得己利乃堪爲人天福田。故號應供。
己利 得호매 미처ᅀᅡ 어로 人天 福田이 ᄃᆞ외릴ᄊᆡ 應供이라 ᄒᆞ니라
諸有結者卽惑習之業爲二十五有之生因。
諸有結은 惑習의 業이 二十^五有의 나논 因이 ᄃᆞ외ᄂᆞ니
以因盡則果亡。是謂不生也。
因이 다ᄋᆞ면 果ㅣ 업ᄂᆞ니 이ᄅᆞᆯ 닐온 不生이라
小乘有定無慧
小乘은 定이 잇고 慧 업서
爲偏縛未得自在。
기우루 얽ᄆᆡ여 自在티 몯거니와
今云心得自在。
이제 닐오ᄃᆡ ᄆᆞᅀᆞ미 自在타 호ᄆᆞᆫ
乃是定慧兩足俱解脫人。
定과 慧와 둘히 足ᄒᆞ야 다 解脫ᄒᆞᆫ 사ᄅᆞ밀ᄊᆡ니
以明大阿羅漢影響衆爾。
大阿羅漢이 影響衆인 ᄃᆞᆯ ᄇᆞᆯ기니라
影은 그리메오 響ᄋᆞᆫ 뫼ᅀᅡ리니
이 衆이 부텻 說法을 조차
眞實ㅅ 敎化ᄅᆞᆯ 돕ᄉᆞᄫᅡ 펴미 影響 ᄀᆞᆮᄒᆞᆯ씨라
其名曰：阿若憍陳如、摩訶迦葉、優樓頻螺迦葉、
그 일후미 阿若憍陳如와 摩訶迦葉과 優樓頻螺迦葉과
伽耶迦葉、那提迦葉舍利弗、
伽耶迦葉과 那提迦葉과 舍利弗와
大目揵連、摩訶迦旃延、阿㝹樓馱、
大目揵連과 摩訶迦栴延과 阿㝹樓馱와
阿㝹樓馱ᄂᆞᆫ 阿那律이라
劫賓那、憍梵波提、離婆多、
劫賓那^와 憍梵波提와 離婆多와
畢陵伽婆蹉、薄拘羅、摩訶拘絺羅、
畢陵伽婆蹉와 薄拘羅와 摩訶拘絺羅와
難陀、孫陀羅難陀、富樓那彌多羅尼子、
難陀와 孫陀羅難陀와 富樓那彌多羅尼子와
須菩提、阿難、羅睺羅。
須菩提와 阿難과 羅睺羅와
如是衆所知識大阿羅漢等。
이러ᄐᆞᆺ ᄒᆞᆫ 모다 ^ 아논 大阿羅漢ᄃᆞᆯ히며
佛有十大弟子。為法王法臣各備眾德。
十大弟子ㅣ 各各 한 德이 ᄀᆞ조ᄃᆡ
權示專門
權으로 專門을 뵈야
專은 올씨라
輔弼大化。故
큰 敎化ᄅᆞᆯ 돕ᄉᆞᄫᆞᆯᄊᆡ
大迦葉頭陀第一。
大迦葉은 頭陀 第一이오
身子智慧第一。
舍利弗은 智慧 第一이오
目連神通。
目揵連은 神通 第一이오
旃延論議。
迦栴延은 論議 第一이오
阿[少/兔]天眼。
阿那律은 天眼 第一이오
富那說法。
富樓那ᄂᆞᆫ 說法 第一이오
善吉解空。
須菩提ᄂᆞᆫ 解^空 第一이오
阿難多聞。
阿難ᄋᆞᆫ 多聞 第一이오
波離持律。
離婆多ᄂᆞᆫ 持律 第一이오
羅云密行。各居第一。
羅睺羅ᄂᆞᆫ 密行 第一이라
今從憍陳至羅云有二十人者。旁兼眾德圓彰法化也。
憍陳如브터 羅睺羅ㅅᄀᆞ자ᇰ 다 한 德이 ᄀᆞᄌᆞ니 法化ᄅᆞᆯ 두려ᄫᅵ ᄇᆞᆯ기니라
解空ᄋᆞᆫ 空ᄋᆞᆯ 알씨오
持律은 律을 디닐씨오
密行ᄋᆞᆫ 秘密ᄒᆞᆫ ᄒᆡᇰ뎌기라
復有學、無學二千人。
ᄯᅩ 學無學 二千 사ᄅᆞᆷ과
學^無學ᄋᆞᆫ ᄇᆡ홀 일 업슨 사ᄅᆞᄆᆡ게 ᄇᆡ홀씨라
摩訶波闍波提比丘尼，與眷屬六千人俱。
摩訶波闍波提比丘尼 眷屬 六千 사ᄅᆞᆷ ᄃᆞ려 와 이시며
摩訶波闍波提ᄂᆞᆫ 大愛道ㅣ라 ᄒᆞ논 마리라
羅睺羅母耶輸陀羅比丘尼，亦與眷屬俱。
羅睺羅ᄋᆡ 어마님 耶輸陀羅比丘尼 ᄯᅩ 眷屬 ᄃᆞ려 와 이시며
大愛道와 耶輸왜 다 자최ᄅᆞᆯ 뵈야 드틀와 ᄀᆞᆮᄂᆞᆫ 影響衆^이라
菩薩摩訶薩八萬人，皆於阿耨多羅三藐三菩提不退轉；
菩薩摩訶薩 八萬 사ᄅᆞ미 다 阿耨多羅三藐三菩提예 므르디 아니ᄒᆞ샤
皆得陀羅尼；樂說辯才，
다 陀羅尼와 樂說辯才ᄅᆞᆯ 得ᄒᆞ샤
轉不退轉法輪；
므르디 아니ᄒᆞᇙ 法輪을 그우리샤
供養無量百千諸佛，
無量 百千 諸佛을 供養ᄒᆞᅀᆞᄫᅡ
於諸佛所殖衆德本，
諸佛^ᄭᅴ 한 德根源을 시므샤
常爲諸佛之所稱歎；
샤ᇰ녜 諸佛이 일ᄏᆞ라 讚嘆ᄒᆞ시며
以慈修身，善入佛慧；
慈로 몸 닷가 부텻 慧예 잘 드르샤
通達大智，
大智예 通達ᄒᆞ샤
通達ᄋᆞᆫ ᄉᆞᄆᆞᄎᆞᆯ씨라
到於彼岸；
뎌 녁 ᄀᆞᅀᅢ 다ᄃᆞᄅᆞ샤
名稱
名稱이
稱은 마ᄌᆞᆯ씨니 德의 實이 일훔과 마ᄌᆞᆯ씨라
普聞無量世界，
無量 世界예 너비 들이샤
能度無數百千衆生。
無數ᄒᆞᆫ 百千 衆^生ᄋᆞᆯ 잘 濟渡ᄒᆞ시ᄂᆞᆫ 분내러시니
菩薩摩訶薩者。謂菩薩中之大菩薩。即地上等覺之列。
摩訶薩ᄋᆞᆫ 地 우흿 等覺菩薩ᄃᆞᆯ히라
八地已上名不退位。
八地롯 우히 不退位오
退ᄂᆞᆫ 므를씨라
五地七地得陀羅尼。說決定法名不退輪。
五地 七地 陀羅尼ᄅᆞᆯ 得ᄒᆞ야 決定法을 닐우미 不退輪이라
住不退位者。得是道以處已。
不退位예 住호ᄆᆞᆫ 이 道ᄅᆞᆯ 得ᄒᆞ야 제 가져 이쇼미오
轉不退輪者。運是道以利人。
不退輪을 轉호ᄆᆞᆫ 이 道ᄅᆞᆯ 뮈워 ᄂᆞᄆᆞᆯ 利케 ᄒᆞᆯ씨니
此自覺覺他之德也。
自^覺ᄒᆞ고 覺他ᄒᆞᄂᆞᆫ 德이라
以慈修身者意在共濟。
慈로 몸 닷고ᄆᆞᆫ ᄠᅳ디 너비 濟渡호매 잇고
善入佛慧謂能運漚和。
부텻 慧예 잘 드로ᄆᆞᆫ 方便을 잘 ᄡᅳᆯ씨오
通達大智則所證者明。
大智예 通達호ᄆᆞᆫ 證호미 ᄇᆞᆰ고
到於彼岸則所造者實。
뎌 ᄀᆞᅀᅢ 다ᄃᆞ로ᄆᆞᆫ 나ᅀᅡ가미 實ᄒᆞ니
此內德也。
이ᄂᆞᆫ 內德이라
由是充實著現。故名稱普聞。
일로브터 實ᄒᆞᆫ 德이 나다날ᄊᆡ 일후미 너비 들이니
此外德也。
이ᄂᆞᆫ 外德이라
內德通達則有見而化者。
內德이 通達ᄒᆞ면 보아 化ᄒᆞ리 잇고
外德普聞則有聞而化者。故
外德이 너비 들이면 드러 化ᄒᆞ리 이실ᄊᆡ
其所度至於無數百千。皆大菩薩之德。
그 濟渡ᄒᆞ샤미 無數 百千에 니르니 다 大菩薩ㅅ 德이라
地前所無矣。
地前에 업슨 거시라
其名曰：文殊師利菩薩、觀世音菩薩、得大勢菩薩、
그 일후미 ^ 文殊師利菩薩와 觀世音菩薩와 得大勢菩薩와
常精進菩薩、不休息菩薩、寶掌菩薩、
常精進菩薩와 不休息菩薩와 寶掌菩薩와
藥王菩薩、勇施菩薩、寶月菩薩、
藥王菩薩와 勇施菩薩와 寶月菩薩와
月光菩薩、滿月菩薩、大力菩薩、
月光菩薩와 滿月^菩薩와 大力菩薩와
無量力菩薩、越三界菩薩、跋陀婆羅菩薩、
無量力菩薩와 越三界菩薩와 跋陀婆羅菩薩와
彌勒菩薩、寶積菩薩、導師菩薩，
彌勒菩薩와 寶績菩薩와 導師菩薩와
如是等菩薩摩訶薩八萬人俱。
이러틋 ᄒᆞᆫ 菩薩摩訶薩 八萬 사ᄅᆞ미 다 와 겨시며
此經以智立體故
이 經이 ^ 智로 體ᄅᆞᆯ 셸ᄊᆡ
文殊居首。
文殊ㅣ 爲頭ᄒᆞ야 겨시니
葢文殊具大智妙德為法身體。
文殊ㅣ 大智妙德이 ᄀᆞᄌᆞ샤 法身體 ᄃᆞ외샤
為諸佛師為世間眼。
諸佛ㅅ 스스ᇰ이 ᄃᆞ외시며 世間 누니 ᄃᆞ외샤