월인석보 11권
又此識體 具三藏義。
이 識體 세 가짓 藏ㄱ ᄠᅳ디 ᄀᆞᄌᆞ니
能藏。所藏。執藏。故
能藏 所藏 執藏일ᄊᆡ
名為藏。
일후미 藏이니
謂與雜染 互為緣故。
雜染과 서르 緣이 ᄃᆞ외논 젼ᄎᆡ며
有情執為自內我故。
有情이 자바 제 內我ᄅᆞᆯ 삼논 젼ᄎᆡ라
復能了別 種子根身 及器世間 三種境故。
ᄯᅩ 能히 種子와 根身과 器世間과 세 가짓 境을 ᄀᆞᆯᄒᆡᆯᄊᆡ
名之為識。
일후믈 識이라 ᄒᆞᄂᆞ니라
없음
器世間ᄋᆞᆫ 三界라
古釋云。
녯 사ᄅᆞ미 사교ᄃᆡ
一能藏者。即能含藏義。
一 能藏ᄋᆞᆫ 곧 能히 含藏ᄒᆞ논 ᄠᅳ디니
猶如庫藏 能含藏寶貝。
庫藏ᄋᆡ 寶貝ᄅᆞᆯ 能히 含藏호미 ᄀᆞᆮᄒᆞᆯᄊᆡ
故得藏名。
藏ㅅ 일후믈 得ᄒᆞ며
此能含藏雜染種故。名之為藏。
雜染種ᄋᆞᆯ 能히 含藏ᄒᆞᆯᄊᆡ 일후미 藏이니
亦即持義。
ᄯᅩ 곧 디니논 ᄠᅳ디라
二所藏者 即是所依義。
二 所藏ᄋᆞᆫ 곧 이 브툰 ᄃᆡ라 혼 ᄠᅳ디니
猶如庫藏 是寶等所依故。
庫藏이 寶貝의 브튼 ᄃᆡ ᄀᆞᆮᄒᆞᆯᄊᆡ며
此識 是雜染法所依處故。
이 識이 雜染法의 브툰 ᄯᅡ힐ᄊᆡ니라
三執藏者。堅守不捨義。
三 執藏ᄋᆞᆫ 구디 守ᄒᆞ야 ᄇᆞ리디 아니ᄒᆞ논 ᄠᅳ디니
猶如金銀等藏 為人堅守。執為自內我。故名為藏。
金銀 ^ 等 藏이 사ᄅᆞ미 구디 守ᄒᆞ야 자바 제 內我 사모미 ᄀᆞᆮᄒᆞᆯᄊᆡ 일후미 藏이며
此識 為染末那堅執為我。故名為藏。
이 識이 더러ᄫᅳᆫ 末那애 구디 자바 날 사모미 ᄃᆞ욀ᄊᆡ 일후미 藏이라
起信鈔 釋云。
起信鈔애 사겨 닐오ᄃᆡ
能藏所藏者。且所藏義。
所藏 ᄠᅳ든
謂此識體藏 是根身種子器世間 所藏處也。
이 識體藏이 根身과 種子와 器世間ᄋᆡ 갈맷ᄂᆞᆫ ᄯᅡ히니
以根等 是此識相分故
根 等이 이 識의 相分일ᄊᆡ
如藏中物像。
藏中 物像 ᄀᆞᆮᄒᆞ며
如身在室內。
모미 室內예 잇ᄃᆞᆺ ᄒᆞ니
欲覓賴耶識 祇在色心中。
賴耶識을 얻고져 호ᇙ딘댄 오직 色心 中에 잇고
欲覓摩尼珠。秖在青黃內。
摩尼珠를 얻고져 호ᇙ딘댄 오직 靑黃 內예 잇ᄂᆞ^니라
次能藏義。
버거 能藏 ᄠᅳ든
謂根身等法 皆藏在識身之中。
根 身 等 法이 다 識身 中에 갈마 이쇼미
如像在珠內。
像이 구슰 소배 잇ᄃᆞᆺ ᄒᆞ니
欲覓一切法 總在賴耶中。
一切 法을 얻고져 호ᇙ딘댄 다 賴耶 中에 잇고
欲覓一切像 總在摩尼內。
一切 像ᄋᆞᆯ 얻고져 호ᇙ딘댄 다 摩尼 內예 잇ᄂᆞ니
與前義 互為能所。
알ᄑᆡᆺ ᄠᅳᆮ과 서르 能所ㅣ ᄃᆞ욀ᄊᆡ
故云 能藏自體 於諸法中
닐오ᄃᆡ 能히 제 體ᄅᆞᆯ 諸法 中에 갈ᄆᆞ며
能藏諸法 於自體內。
能히 諸法을 제 體ㅅ 內예 갊다 ᄒᆞ니라
此識 有二種義，
이 識이 두 가짓 ᄠᅳ디 잇ᄂᆞ니
謂真如有二義。
眞如ㅣ 두 ᄠᅳ디 잇ᄂᆞ니
一。不變義。
ᄒᆞ나ᄒᆞᆫ 變티 아니ᄒᆞᄂᆞᆫ ᄠᅳ디오
二。隨緣義。
둘흔 隨緣ᄒᆞᄂᆞᆫ ᄠᅳ디라
無明亦二義。
無明이 ᄯᅩ 두 ᄠᅳ디니
一。無體 即空義。
ᄒᆞ나ᄒᆞᆫ 體 업수미니 곧 뷘 ᄠᅳ디오
二。有用 成事義。
둘흔 用 이쇼미니 일 일우ᄂᆞᆫ ᄠᅳ디라
此真妄中。各由初義故。成上真如門也。
이 眞과 妄괏 中에 各各 첫 ᄠᅳ들 브틀ᄊᆡ 우흿 眞如門이 일오
各由後義故。成此生滅門也。
各各 後ㅅ ᄠᅳ들 브틀ᄊᆡ 이 生滅門이 이니라
此隨緣真如。及成事無明 亦各有二義。
이 隨緣ᄒᆞᄂᆞᆫ 眞如와 일 일우ᄂᆞᆫ 無明이 ᄯᅩ 各各 두 ᄠᅳ디 잇ᄂᆞ니
一。違自順他義。
ᄒᆞ나ᄒᆞᆫ 제게 어긔오 ᄂᆞᄆᆡ게 順ᄒᆞᆫ ᄠᅳ디오
二。違他順自義。
둘흔 ᄂᆞᄆᆡ게 어긔오 제게 順ᄒᆞᆫ ᄠᅳ디라
無明中。初違自順他。亦有二義。
無明 ^ 中에 제게 어긔오 ᄂᆞᄆᆡ게 順호미 ᄯᅩ 두 ᄠᅳ디 잇ᄂᆞᆫ니
一。能反對詮 示性功德。
ᄒᆞ나ᄒᆞᆫ 能히 드위ᅘᅧ 對ᄒᆞ야 닐어 性功德을 뵈요미오
二。能知名義 成淨用。
둘흔 名義ᄅᆞᆯ 能히 아라 조ᄒᆞᆫ 用ᄋᆞᆯ 일울씨라
違他順自。亦有二義。
ᄂᆞᄆᆡ게 어긔오 제게 順호미 ᄯᅩ 두 ᄠᅳ디 잇ᄂᆞ니
一。覆真理。
ᄒᆞ나ᄒᆞᆫ 眞理ᄅᆞᆯ 두푸미오
二。成妄心。
둘흔 妄心이 일씨라
真如中。違他順自。亦有二義。
眞如 中에 ᄂᆞᄆᆡ게 어긔오 제게 順호미 ᄯᅩ 두 ᄠᅳ디 잇ᄂᆞ니
一。翻對妄染 顯自真德。
ᄒᆞ나ᄒᆞᆫ 거츤 더러ᄫᅮ믈 드위ᅘᅧ 對ᄒᆞ야 제 眞實ㅅ 德을 나토오미오
二。內熏無明 令起淨用。
둘흔 안ᄒᆞ로 無明을 ᄧᅬ야 조ᄒᆞᆫ 用ᄋᆞᆯ 니르왇긔 호미라
違自順他。亦有二義。
제게 어긔오 ^ ᄂᆞᄆᆡ게 順호미 ᄯᅩ 두 ᄠᅳ디 잇ᄂᆞ니
一。隱自真體義。
ᄒᆞ나ᄒᆞᆫ 제 眞體ᄅᆞᆯ 숨기논 ᄠᅳ디오
二。顯現妄法義。
둘흔 거츤 法을 나토ᄂᆞᆫ ᄠᅳ디라
此上真妄 各四義中。
이 眞妄이 各各 네 ᄠᅳᆮ 中에
由無明中 反對詮示義。
無明 中엣 드위ᅘᅧ 對ᄒᆞ야 닐어 뵈ᄂᆞᆫ ᄠᅳᆮ과
及真如中 翻妄顯德義。
眞如中엣 妄ᄋᆞᆯ 드위ᅘᅧ 德 나토ᄂᆞᆫ ᄠᅳ디
從此二義。得有本覺。
이 두 ᄠᅳ들 브터 本覺이 이시며
又由無明中 能知名義。
ᄯᅩ 無明 中엣 能히 名義 아롬과
及真如中 內熏義。
眞如 中엣 안ᄒᆞ로 ᄧᅬᄂᆞᆫ ᄠᅳ디
從此二義。得有始覺。
이 두 ᄠᅳ들 브터 始覺이 이시며
없음
始覺ᄋᆞᆫ 처ᅀᅥᆷ 알씨라
又由無明中 覆真義。
ᄯᅩ 無明 中엣 眞 둡ᄂᆞᆫ ᄠᅳᆮ과
及真如中 隱體義。
眞如 中엣 體 숨기ᄂᆞᆫ ᄠᅳ디
從此二義。得有根本不覺。
이 두 ᄠᅳ들 브터 根本不覺이 이시며
又由無明中 成妄義。
ᄯᅩ 無明 中엣 妄 이ᄂᆞᆫ ᄠᅳᆮ과
及真如中 顯妄義。
眞如 中엣 妄 나토ᄂᆞᆫ ᄠᅳ디
從此二義。得有枝末不覺
이 두 ᄠᅳ들 브터 枝末不覺이 잇ᄂᆞ니
此生滅門中。真妄略 開四義。
이 生滅門 中에 眞妄ᄋᆞᆯ 조리면 네 ᄠᅳ데 열오
廣即有八門。
너피면 곧 여듧 門이 잇ᄂᆞ니라
若約兩兩相對。和合成緣起分相
둘콤 둘콤 서르 對ᄒᆞ야 和合ᄒᆞ야 緣起 分相 이로ᄆᆞᆯ 자바 니ᄅᆞ건댄
有四門。
네 門이 잇ᄂᆞ니
謂二覺。二不覺
二覺과 二不覺괘라
若本末 不相離。
本末이 서르 여희디 아니호ᇙ디면
但唯有二門。謂覺與不覺。
오직 두 門이 잇ᄂᆞ니 覺과 不覺괘라
若鎔融總攝。唯有一門。謂一心生滅門也。
노겨 어울워 모도자보ᇙ딘댄 오직 ᄒᆞᆫ 門이 잇ᄂᆞ니 一心生滅門이라
【疏】又若約諸識分相門。
ᄯᅩ 諸識分相門ᄋᆞᆯ 자바 니ᄅᆞ건댄
本覺 本不覺 在本識中。
本覺과 本不覺ᄋᆞᆫ 本識 中에 잇고
餘二 在生起事識中。
나ᄆᆞᆫ 둘흔 生起事識 中에 잇ᄂᆞ니라
若約本末不二門。
本末이 둘 아닌 門ᄋᆞᆯ 자바 니ᄅᆞ건댄
並在一本識中。
다 ᄒᆞᆫ 本識中에 잇ᄂᆞ니
故云 此識 有二義也。
그럴ᄊᆡ 닐오ᄃᆡ 이 識이 두 ᄠᅳ디 잇다 ᄒᆞ니라
【疏】問。此中一識有二義。與上一心有二門 何別耶。
무로ᄃᆡ ᄒᆞᆫ 識이 두 ᄠᅳᆮ 잇다 홈과 우희 ᄒᆞᆫ ᄆᆞᅀᆞ매 두 門 잇다 호미 엇뎨 다ᄅᆞ뇨
答。
對答호ᄃᆡ
上一心中 含於二義。
ᄒᆞᆫ ᄆᆞᅀᆞ매 ^ 두 ᄠᅳᆮ 잇다 호ᄆᆞᆫ
謂不守自性 隨緣義。
제 性을 가졧디 몯ᄒᆞ야 隨緣ᄒᆞᄂᆞᆫ ᄠᅳᆮ과
及不變自性 絕相義。
제 性을 變티 아니ᄒᆞ야 相 그츤 ᄠᅳ디오
今此但就隨緣門中。染淨理事 無二之相。
이ᄂᆞᆫ 오직 隨緣門 中에 더러ᄫᅳ며 조ᄒᆞ며 理와 일왜 둘 업슨 相애 나ᅀᅡ가
明此識也。